Салтанатты шараға аудан басшыларымен бірге ардагерлер кеңесі, шаруа қожалық төрағалары мен кәсіпкерлер, жастар, спорт мектептерінің шәкірттері қатысты.
Еліміздің Әнұраны ойналып, алғашқы құттықтау сөз кезегі Жамбыл облысы әкімдігінің дене шынықтыру және спорт басқармасы басшысының орынбасары Нұржан Жолдасбековке берілді.
Нұржан Қырықбайұлы 2024 жылы спортшыларымыздың жеткен жетістіктеріне тоқталып, ел тарихында әйелдер арасында тұңғыш әлем чемпионы атағын жеңіп алған спортшымызға алғысын, игі тілегін жеткізіп, облыс әкімі Ербол Қарашөкеевтің Құттықтау хатын оқыды.
Спорт дүлдүлі Ақмарал Науатбекті аудан әкімінің орынбасары Асхат Жабағы мен аудандық мәслихаттың төрағасы Зиядхан Бүрлібаев та құттықтады.
Асхат Базарбайұлы аудан әкімі Жалғас Мұртазаның арнайы Құттықтау хатын оқып, Ақмарал Маратқызына тапсырды.
Сонымен бірге жерлесімізге аудандағы кәсіпкерлер, шаруа қожалық жетекшілері, ел ағаларынан сый ретінде бес миллион теңгелік сертификат пен ықылас гүлін тапсырды. Жаттықтырушысы Айдын Анапинге аудан әкімінің Құрмет грамотасы мен бір миллион теңге сыйға берілді. Анасының да иығына ақ жаулық пен қазаққы комзол жапты.
Жамбыл облысының Құрметті ардагері, Жуалы ауданының Құрметті азаматы, ардагер ұстаз Әбілқасым Ергебеков споршы қызымызға ақ батасын берді.
Ақмарал Науатбекті «Садыбай-Байтана» қорының президенті Досжан Әлжапаров, профессор Бейсенбай Төлебеков, медицина саласының ардагері Тұрғын Жігітеков, ауданның шаруа қожалықтары мен кәсіпкерлерінің атынан Серік Садиров, Еркебай Нағашыбеков, Сыбанбай Арынов, Әсет Олжабаев, Мұхамеджан Әсемов, Диқан және Қайрат ауылынан Жарас Сармурзин, Бақтыбай Жартыбаев та игі тілектерін білдірді. «Садыбай-Байтана» қорының атынан чемпионның жарына тұлпар мінгізілді.
Салтанатты шарада Ақмарал Науатбек пен мәпелеп өсірген анасы Роза Ергешқызы және әкесінің бауыры сөз сөйледі. Анасы қызының Париж төріндегі ақтық белдесуде жеңіске жеткені ел-жұртының тілегі, қолдауы деп есептейтінін жеткізіп, туған ел-жұртының құрмет-қошеметіне, қолдауларына ризашылығын білдірді.
Ақмарал Науатбек жерлестерінің құмет-қошеметіне, ыстық ықыластарына алғысын білдіріп, алтын медаль жуалылық жас спортшыларға жұғысты болсын деген тілегін жеткізді. Шара соңынан республикалық батагөйлер байқауының жүлдегері Сейітқазы қажы Медетбеков ақ батасын берді.
Одан әрі спортшы Қайрат ауылындағы Кеңес Одағының Батыры Бауыржан Момышұлының музейіне барып, Батырдың рухына тағзым етіп, музей жәдігерлерімен танысып, музейге қолтаңба қалдырды. Туған ауылы Диқан ауылында чемпион Аула клубының филиалынан ашылған дзюдо күресі үйірмесінің лентасын қиды. Үйірме мүшелері бүгінде облыстық жарыстарда топ жарып жүр. Мұнда болашағынан үміт күттіретін жас спортшылар көп. Ақмарал Науатбек болашақ чемпиондарға игі тілегін білдіріп, жігерлендірді.
Мұнда да жерлестері спортшыға ақ тілектерін айтып, бата беріп, естелік суретке түсті. Сонымен бірге ауылдық мешітте дастарқан жайылып, ата-бабасына құран бағыштады.
turaninfo.kz
