Өңірге жұмыс сапары аясында министр Жамбыл облысының Қордай, Шу және Меркі аудандарын аралады. Қордай ауданындағы Қайнар ауылында 3 800 га суармалы алқапты сумен жабдықтауды ұлғайту үшін қысымды су құбыры салынып жатыр. Бұл жергілікті шаруаларды суармалы сумен қамту мәселесін толық шешу үшін қажет.
Нұржан Нұржігітов Шу ауданында Тасөткел су қоймасы бөгетінің сейсмикалық тұрақтылығын арттыра отырып, 2-ші кезекті қайта жаңарту жұмыстарымен танысты. Жобаның басты мақсаты — бөгеттің жер сілкінісіне төзімділігін арттыру және апатты су тастау бөлігін салу болып табылады. Сондай-ақ, төтенше жағдай кезіндегі дабыл жүйесі мен бейнебақылау орнату, өткізу пунктін жақсарту сынды қауіпсіздік шаралары ескерілді.
Шу ауданында іске асырылып жатқан тағы бір маңызды құрылыс — ирригациялық-дренаждық жүйелерді жетілдіру жобасы. Бұл жұмыстар толық аяқталғанда Шу ауданында 5172 га суармалы алқапты сумен қамтамасыз ету сапасы мен жердің мелиоративтік жағдайы жақсарады.
Меркі ауданында Үлкен Шу каналының батыс тармағын қосымша сумен қамтамасыз ету мақсатында 46 ұңғыма қайта бұрғыланды. Министр «Андас — 1», «Андас — 2» және «Андас — 3» құйма тоғандарының құрылысымен де танысты. Үш тоған қосымша 1,93 млн текше метр су жинауға мүмкіндік береді.
Су ресурстары және ирригация министрлігінің баспасөз қызметі
