Адам жанына араша түсіп, жүрегіне жылылық пен мейірімділікті сыйғызған ақ халатты абзал жандардың бірі – Сидорова Анастасия Ивановна. Дертке дауа, жанға сая қастерлі мамандықты бала кезінен армандап өскен дәрігер «Мамандығым-мақтанышым, ақ халатым-адалдығым, жылы сөзім – жан жадыратар шипалы емім» деп біледі. Ол қызығы мен қиындығы қатар жүретін, үлкен жауапкершілікті талап ететін, жұмысы да ауқымды мерейлі мамандықты абыроймен атқарып, саналы ғұмырын денсаулық саласына арнап келеді.
Сидорова Анастасия Ивановна 1962 жылы Жамбыл облысы, Жуалы ауданы, Билікөл ауылында дүниеге келген. Мектеп қабырғасында жүргенде химия, биология пәндерін басқасынан артық көретін. Осылайша, 1980 жылы Ақтөбе мемлекеттік медицина институтына түсіп, оны 1986 жылы «Емдеу ісі» мамандығы бойынша тәмамдады.
Еңбек жолын Жамбыл қалалық №1 емханасында дәрігер-интерн ретінде бастайды. 1988 жылдан бастап Тараз қаласының жедел медициналық жәрдем станциясында көшпелі бригада дәрігері, ал 2019 жылдан бастап бүгінгі күнге дейін Жамбыл облыстық жедел жәрдем стансасында аға дәрігері қызметін атқаруда.
Денсаулық сақтау саласында еңбек жолын жалғастырған 34 жыл уақыттың ішінде мыңдаған адамның өміріне арашашы болды. Талай адамның тағдырына араласты, үлкен-кішіге көмек қолын созды. Дүние есігін ашқан нәрестелердің кіндігін кесті. Алуан түрлі оқиғаларды көзімен көріп, бетпе- бет арпалысты. Қызмет бабымен күнделікті орта есеппен айтқанда 20-30 шақыртуға барады. 20-30 есікті қағады, сонша табалдырықты аттап, осынша адамның өміріне қызмет көрсетеді. «Бес саусақ бірдей емес» дегендей шақырту барысында сан түрлі мінезі бар адамдармен кездеседі. Кейбіреудің оқыс әрекеттеріне куә болған кездері де бар. Жедел жәрдем көлігі жеткенше кіндігі мойынына оралып туғандықтан көгеріп кеткен шақалаққа алғашқы көмегін көрсетіп, өмірін сақтап қалған. Сол сәби қазір дін аман, бес жаста.
«Әрине, адам жанының инженері болу оңай емес және кез келгеннің меңгере алмайтын кәсібі. Шақыртумен барғанда науқасқа дереу алғашқы көмекті көрсету, бірден шешім қабылдау секілді жауапкершілікте ағаттық жасауға болмайды. Алдыңда адам тағдыры тұрғандықтан біліктілік пен ептілік басты қажеттілік, ал тәжірибе жинақтап, ізденіп, үйрену өмір талабы,- дейді ол.
Анастасия Ивановна өз кәсібін жетік меңгерген, тәжірибелі маман.. Өткен 2017 жылы көп жылдық еңбегі мен үздік жұмысы үшін «Денсаулық сақтау үздігі» төсбелгісімен марапатталды. Адам денсаулығының сақтаушысы бола білген ол, өзінің адал еңбегімен көпшіліктің қошеметіне бөленіп жүрген мәртебелі мамандық иесі, білікті дәрігер.
Денсаулық сақтау басқармасының баспасөз қызметі
