ЛАТЫН ӘЛІПБИІНІҢ НҰСҚАЛАРЫ ТАЛҚЫЛАНДЫ
М.Х.Дулати атындағы Тараз мемлекеттік университетінің технологиялық кешенінде «Жамбыл облысы Кәсіподақтар орталығы» аумақтық кәсіподақтар бірлестігі мен гуманитарлық-әлеуметтік ғылымдар факультетінің ұйымдастыруымен «Рухани жаңғырудың жарқын жолы» тақырыбында дөңгелек үстел өтті.
Жиынды алғы сөзімен ашқан бірінші проректор, т.ғ.д., профессор Асқар Бекәділұлы Президенттің жуырда жарық көрген « Болашаққа бағдар: рухани жаңғыру» мақаласына кеңінен тоқталып өтті. Оның ішінде 2025 жылға дейін еліміздің толығымен латын әліпбиіне көшу мәселесі бүгінгі күн тәртібіндегі негізгі мәселе екені айтылды. Жер бетінде 240 мемлекет болса солардың 40% бүгінде латын қарпін қолданса, әлемде ақпараттың 70 % осы әліпбимен тарайды. «Латын әліпбиі бізге жат емес. Кезінде қолданыста болған. Бүгінгі таңда сол әліпбиімізге қайта оралмақшымыз» деген Асқар Абдуалы бүкіләлемдік жаһандану кезінде көштен қалмай, жақсысын бойымызға сіңіріп, ұлттық құндылықтарымызды сақтап қалуға шақырды.
Келесі сөз кезегін алған «Жамбыл облысы Кәсіподақтар орталығы» аумақтық кәсіподақтар бірлестігінің төрайымы Бақыт Сапарбаева аталмыш кездесудің маңыздылығына тоқталып, бұндай түсіндіру жұмыстары басқа да білім ошақтарында, жоғары оқу орындарында ұйымдастырылатынын айтты.
Латын әліпбиіне көшу мәселесін талқылауға арналған жиында сөз алған гуманитарлық-әлеуметтік ғылымдар факультетінің деканы Әзімхан Ыбырайым талқылауға ұсынылған әліпби нұсқаларының кемшін тұстарына, тіл мамандарының айтқан пікірлеріне кеңінен тоқталды.
-Тәуелсіздік алған жылдардан бері бұл мәселе айтылып келе жатыр. Елбасының 2012 жылғы « Қазақстан – 2050 Стратегиясы қалыптасқан мемлкететтің жаңа бағыты» атты Жолдауында да латын әліпбиіне көшу мәселесі көтерілген болатын. Бүгінде ұсынылып отырған әліпби нұсқасындағы қателіктер қазақ әліпбиінде қанша төл дыбыстарының барын білмеуімізден болып тұр. Одан кейінгі мәселе сол төл дыбыстарымызды қалай белгілейтінімізді шешуіміз керек. Латын әліпбиіне көшу арқылы біз әріптер ықшамдалады, сыйымдылық артады деп күттік. Ал екі әріптің қосарлануы арқылы күтілетін нәтиже теріске шыққалы тұр. Сонымен қатар, әліппе ең алдымен 6, 7 жасар баланың қабілетіне, қабылдау деңгейіне қарай жасалу керек — деген Әзімхан Оразбайұлы жаппай талқылаулар арқылы әлі де әліппенің дұрыс нұсқасы ұсынылатынына сенім білдіріп, латын әліпбиі өркениетке алып баратын негізгі жол екенін айтты.
Дөңгелек үстелде қазақстан тарихы кафедрасының меңгерушісі, т.ғ.к., доцент Ермекбай Серікбаев «Рухани жаңғыру – табысты ел болудың кепілі» тақырыбында баяндама жасады.
Жиын соңында ТарМПИ, ТарМУ студенттері де өз ойларын ортаға салып, латын әліпбиін қолдайтындарын жеткізді.
МЕДИА-ҚЫЗМЕТ
