Жамбыл облысы Тексеру комиссиясы бүгінгі таңда ҚР «Мемлекеттік аудит және қаржылық бақылау туралы» Заңының 13, 29 бабтарына және бекітілген мемлекеттік аудит объектілерінің тізбелеріне сәйкес, 13 мемлекеттік аудит және сараптамалық-талдау іс-шараларын жүргізген. Оның ішінде мемлекеттік аудит іс-шаралары — 4, сараптамалық-талдау іс-шаралары — 9. 37 мемлекеттік аудит объектісінде жоспарлы аудиторлық іс-шаралары жүргізілген, оның ішінде 35 мемлекеттік мекеме, 2 квази-мемлекеттік сектор субъектілері. Жыл басынан жүргізілген мемлекеттік аудиттің нәтижесінде 125 бірлікті құрайтын рәсімдік сипаттағы бұзушылықтар және аудитпен қамтылған қаражаттың сомасынан 13,1%-ды құрайтын 6 500 840,9 мың теңгенің бұзушылықтары анықталған. Анықталған бұзушылықтардың ішінде қалпына келтірілуге және өтелуге жататыны 6 403 837,9 мың теңге, анықталған бұзушылықтар сомасынан 98,5% Оның ішінде өтелуге жататыны 23 085,0 мың теңге, қалпына келтірілуге жататыны 6 380 752,9 мың теңге. Бүгінгі таңда қалпына келтірілуге және өтелуге жататын 6 403 837,9 мың теңгенің 862 967,2 мың теңгесі немесе 13,4% қалпына келтірілген және өтелген. Оның ішінде: 15 108,4 мың теңге бюджет кірісіне өтеліп, 847 858,8 мың теңгесі қалпына келтірілген. Айырмасы болып табылатын 5 540 870,7 мың теңге немесе 86,6 пайызы жолданған нұсқамалардың белгіленген орындалу мерзімдері келгенде орындалады деп күтілуде. Лауазымды тұлғалардың тарапынан заңсыз іс-әрекеттердің орын алуына байланысты процессуалдық шешім қабылдау үшін 3 материал құқық қорғау органына, атап айтқанда: Қазақстан Республикасы қаржы мониторингі агентігінің Жамбыл облысы бойынша экономикалық тергеу департаментіне 1 материал, Қазақстан Республикасы Сыбайлас жемқорлыққа қарсы іс-қимыл агенттігінің Жамбыл облысы бойынша Департаментіне 2 материал жолданған. Жамбыл облысы бойынша ЭТД-ның ақпаратына сәйкес жолданған 1 материал қылмыстық іске қосылған. Ал, Қазақстан Республикасы Сыбайлас жемқорлыққа қарсы іс-қимыл агенттігінің Жамбыл облысы бойынша Департаментіне жолданған 2 материал қаралу үстінде. Аудит нәтижесінде анықталған бұзушылықтарға жол берген мемлекеттік аудит объектілерінің 35 қызметшісі тәртіптік жауапкершілікке тартылды. Сонымен қатар, 42 қызметші әкімшілік жауапкершілікке тартылып, 7 254,0 мың теңге көлемінде әкімшілік айыппұл салынған.
Лауазымды тұлғалардың тарапынан Қазақстан Республикасының «Мемлекеттік сатып алу туралы» және «Бухгалтерлік есеп туралы» Заңнама талаптары бұзылғандықтан, әкімшілік құқық бұзушылық туралы 124 материал әкімшілік шара қолдану үшін Жамбыл облысы бойынша ішкі мемлекеттік аудит департаментіне жолданып, нәтижесінде 94 материал бойынша жалпы сомасы 7 223,4 мың теңге айыппұл салынған, 28 материал қаралу үстінде, 2 материал бойынша әкімшілік шара қолдану мерзімі өтуіне байланысты шара қолданылмаған.Сондай-ақ, Тексеру комиссиясының өз құзыреті шеңберінде берген заңды талаптарын орындамағаны немесе тиісінше орындамағаны үшін 1 материал сот органына жолданып, 30,6 мың теңге айыппұл салынды. Сонымен қатар, құрылыс барысында бекітілген жобада көзделген жобалық шешімдердің дәл орындалуын қамтамасыз етпегені үшін, авторлық және техникалық қадағалауды жүзеге асырған тұлғалардың жауапкершілігін қарау үшін, Жамбыл облысы әкімдігінің мемлекеттік сәулет-құрылыс бақылау басқармасына әкімшілік құқық бұзушылық туралы 24 материал жолданған. Жалпы жүргізілген мемлекеттік аудит іс-шараларының қорытындылары бойынша бүгінгі таңда Тексеру комиссиясының 9 қаулысы қабылданған. һАудит қорытындысы бойынша анықталған бұзушылықтарды жою және кемшіліктерге жол берген лауазымды қызметкерлердің жауапкершілігін қарау жөнінде мемлекеттік аудит объектілеріне 16 нұсқама жолданған. Аудиторлық қорытындыларға және нұсқамаларға сәйкес, мемлекеттік аудит объектілеріне 117 тапсырмалық және ұсынымдық тармақтар берілген. Несие шарты бойынша қабылданған міндеттемелері тиісінше орындалмаған, түпкілікті қарыз алушылардың алған несиелерін мақсатына сай пайдалану бойынша тексеру жүргізілмеген, түпкілікті несие алушының тарапынан сатып алынған негізгі құралдары қолданылмай, бюджет қаражаты тиімсіз жұмсалған. Құрылыс монтаждау жұмыстары сапасыз орындалған немесе толық орындалмаған. Мердігерлер тараптарынан жұмыстарды белгіленген мерзімде орындамағандары үшін тиісті өсімпұл есептелмеген, мердігерлер келісім шарт бойынша өз міндеттемелерін тиісінше орындамаған үшін жосықсыз қатысушы деп тану туралы талап-арызбен сотқа жүгінбеген. Мемлекеттік сатып алу келісім шарты тікелей жасасу арқылы бір көзден алу тәсілімен жүзеге асырылған. Жаңадан соғылған құрылыс объектілері кіріске алынбай шығындар ретінде есептен шығарылған және негізгі құралдардың амортизациялары есептелмеген.
Мемлекеттік аудит және сараптамалық — талдау іс-шараларының нәтижесінде анықталған бұзушылықтар мен кемшіліктердің себептері де бар. Бұзушылықтар мен кемшіліктердің орын алуы негізінен мемлекеттік аудит объектілері жауапты тұлғаларының тарапынан нормативтік-құқықтық актілері талаптарын өз деңгейінде білмеуі және мемлекеттік аудит объектілері басшыларының тарапынан қадағалаудың жеткілікті деңгейде болмауы, бюджеттік кредиттердің нысаналы және тиімді пайдалануын, өтелуі мен оларға қызмет көрсетілуін бақылауда ұстамау, мониторингті жүзеге асырмау және өзіне қабылдаған міндеттемелерін тиісінше орындамау, сондай-ақ мамандар мен бухгалтерлік қызметшілердің кәсіби деңгейінің төмендігінен орын алған.
Материал Жамбыл облысы әкімдігінің ішкі саясат басқармасының тапсырысы бойынша дайындалды
