«ҚазАвтоЖол» ұлттық компаниясы ұзындығы 62 шақырымды құрайтын республикалық маңызы бар «Күрті-Бұрылбайтал» автожолының Жамбыл облысы бойынша 2152-2214 шақырым учаскесінде қайта жаңарту жұмыстарының аяқталғаны туралы хабарлайды. Аталмыш учаске «Орталық-Оңтүстік» көлік дәлізінің маңызды бөлігінің бірі.
Қайта жаңартудан өткен автожол І-б техникалық санатына ауыстырылып, екі бағытта төрт жолақты қозғалыспен қамтамасыз етілді. Жоба аясында бір көлік жол айрығы, алты көпір мен өтпежол соғылып, 785 мың тонна асфальтбетон төселіп, екі демалыс орны мен 4 көлік павильоны соғылды. Қауіпсіз көлік қозғалысын қамтамасыз ету мақсатында учаскеде тосқауылдар мен жол белгілері орнатылып, таңбалар салынды. Құрылыс жұмыстарына 2 асфальтбетон зауыты, 2 уатып-сұрыптағыш қондырғымен, 150-ден астам арнайы техника мен 295 жұмысшы жұмылдырылды.
Мемлекет басшысының Жолдауын жүзеге асыру аясында биыл республикалық маңызы бар 3,1 мың шақырым автожол жөндеу жұмыстарымен қамтылған, оның 1,5 мың шақырымы осы жылдың соңына дейін аяқтау жоспарланған. Сондай-ақ, 2024 жылдың 20 қыркүйегіне дейін 188 шақырым автожол қолданысқа беріледі. Қарағанды облысында Қарағанды қаласынан Балқашқа қарай 164 шақырым, Ақтөбе облысында 18 шақырым құрайтын Қандыағаш ауылының айналма жолы.
«ҚазАвтоЖол» ҰК баспасөз қызметі
