Жамбыл облысы әкімінің өкімімен Меркі ауданы әкімі Жиенқұлов Ербол Жұмабекұлы таныстырылды.
Ербол Қарашөкеев аудан активіне жаңа әкімді таныстырып, жұмысына сәттілік тіледі.
Облыс әкімі Мемлекет басшысының тапсырмаларын нәтижелі орындау, ауданның әлеуетін және мемлекеттік бағдарламалардың мүмкіндіктерін ұтымды пайдалана отырып, халықтың әл-ауқатын арттыру басты міндет екенін баса айтты.
Сонымен қатар инвестиция тарту, салық базасын ұлғайту, қоғамдық-саяси тұрақтылықты сақтау, жаңа жұмыс орындарын ашу және кәсіпкерліктің әлеуметтік жауапкершілігін арттыруға бағытталған ауқымды жобаларды жүзеге асыру бойынша нақты жұмыстар жүргізу керектігін атап өтті.
Өз кезегінде Ербол Жиенқұлов артылған сенімді ақтауға, барлық міндеттерді жемісті жүзеге асыруға күш салатынына сендірді.
Жиенқұлов Ербол Жұмабекұлы
Жалпы ақпарат, білімі
Ербол Жұмабекұлы 1986 жылы туған, ұлты қазақ, білімі жоғары.
2008 жылы Қазақ Ұлттық аграрлық университетін «ветеринарлық-санитарлық дәрігер» мамандығы бойынша бітірген.
Мансап
Еңбек жолын 2008 жылы ҚР Ауыл шаруашылығы министрлігі Ветеринариялық бақылау және қадағалау комитетінің «Республикалық эпизоотияға қарсы отряд» мемлекеттік мекемесі Жамбыл облысы бойынша филиалының аға маманы болып бастаған.
2012-2017 жылдары — ҚР Ауыл шаруашылығы министрлігі Ветеринариялық бақылау және қадағалау комитетінің «Республикалық эпизоотияға қарсы отряд» мемлекеттік мекемесі Жамбыл облысы бойынша филиалында жетекші маман, бас маман;
2017-2020 жылдары — ҚР Ауыл шаруашылығы министрлігі Ветеринариялық бақылау және қадағалау комитетінің «Республикалық эпизоотияға қарсы отряд» мемлекеттік мекемесі Жамбыл облысы бойынша филиалының басшысы;
2020-2021 жылдары Жамбыл облысы әкімдігінің ветеринария басқармасының басшысы;
2021-2022 жылдың қараша айынан бастап Жамбыл облысы әкімдігінің ауыл шаруашылығы басқармасының басшысы.
2022 жылдың 1 желтоқсанынан бастап бүгінге дейін Жамбыл облысы Жамбыл ауданы әкімінің орынбасары болып еңбек етіп келді.
