Бүгін «Тараз — Арена» спорт кешенінде Жамбыл облыс әкімінің кубогы үшін бұқаралық ақпарат құралдары қызметкерлері арасында шағын футболдан республикалық турнир өтті. Жүлде қоры 1,5 млн. теңге болатын турнирді облыс әкімдігінің ішкі саясат басқармасы мен дене шынықтыру және спорт басқармасы бірлесіп ұйымдастырды.
Астана қаласынан «ХАБАР» телеарнасы, Алматы қаласынан «АПОРТ», Алматы облысынан «ТҰРАН», Қызылорда облысынан «АҚМЕШІТ», Түркістан облысының құрамасы, Шымкент қаласының құрамасы, «ЕРНИЯЗ МЕДИА», облыстың атынан турнирге «JAMBYL» телеарнасы, «Тараз Пресс», «Әулиеата» және «Блогерлер» командалары қатысты.
Турнирдің беташар ойының «JAMBYL» телеарнасы мен «Блогерлер» командасы ашып, 2-1 есебімен әлеуметтік желі белсенділері жеңіске жетті. Жеңіске жеткен команданың қатарынан Бақтияр Бекназаров қақпаның тоғыздығына допты тоғытса, екінші таймда Файзулла Сағымбаев Арман Жаналиевтің керемет пасынан кейін командасын жеңіске жетеледі.
Үш топтан 8 команда ширек финалға шығып, қызықты ойындар басталды. Әсіресе, «Ернияз — медиа» мен «Тұран» командалары арасындағы кездесуде жеңімпаз 11 метрлік айыпдоптардан белгілі болды.
Жартылай финалдың бірінші ойынында «Ақмешіт» мен «Апорт» командалары негізгі уақытта тең түсіп, алматылық команда «лотереяда» жолдары болды.
Екінші жартылай финалда «Тараз Пресс» пен шымкенттік «Ернияз медиа» арасындағы ойын шытырманды кинофильм секілді өтті. Бірінші таймда шымкенттіктер алға шығып, ойынның аяқталуына 2 минут қалғанда 3 гол соғылды. Тараздықтардың қатарында дубль авторы болып Сарысу ауданы әкімдігінің баспасөз хатшысы Нұржан Туғанбай көзге түсті. Бірінші голы баспен, екінші голды Ермұхамед Мәуленнің туған ағасы Нұрмұхамедке қарсы 11 — метрлік айыпдоптан соқты. Негізгі уақытта жеңімпаз анықталмағаннан кейін 11 метрлік айыпдоптан Берік Құрманғали, Нұржан Туғанбай, Нұрмұхамед Мәулен тура гол соғып, командасын финалға шығарды.
Үшінші орын үшін ойында қызылордалық команда мен шымкенттік команда арасында өтті. Ойынның басында екі тез гол соғып алған қызылордалық команда, кездесудің аяқ жағына қарай 2-3 есебімен жеңіліп келе жатып, есепті теңестірді. Тағыда 11 метрліктер тағайындалып, шымкенттік команданың жолы болды. Сөйтіп, көршілер 200 мың теңгелік соммаға ие болды.
Финалда тараздықтар бар күш — жігерлерін салғанына қарамастан, алматылықтарға 3-0 есебімен ойсыра жеңіліп қалды. Жеңімпаздар қатарынан бірінші голды белгілі тележүргізуші Ермек Төрениязов салды.
Турнирдің қорытындысы бойынша «Үздік ойыншы» «Хабар» телеарнасының белгілі журналисі Нұрсұлтан Құрман, «Үздік қақпашы» — Ілияс Сайлаубайұлы («Тұран» командасы), «Үздік қорғаушы» — Еркеғали Балажан («Түркістан» командасы), «Үздік шабуылшы» — Әділбек Жақанов («Ақмешіт» командасы) атанып, 25 мың теңгелік сыйақы алды. Ал, тараздықтарға 400 мың теңге, жеңімпаздарға 700 мың теңге берілді.
Ендігі кезекте осындай турнирдің эстафетасы қызылордалықтарға берілді. Эстафетаны Қызылорда облысы «Нұр Отан» партиясының орынбасары Ержан Байтілес қабылдап алды.
TURANINFO.KZ
