Мамандықтың мықтысы немесе осалы, жаманы мен жақсысы болмайды. Қандай кәсіппен шұғылдансаң да, сол істі жан-тәніңмен жақсы көріп, адал атқара білсең, ол сені бақытқа бөлейді, абыройға жеткізеді. Расында да, өмірден өз жолын адаспай тапқан адам, ұлы Абай айтпақшы, фәниге бір кірпіш болып қаланары анық.
Бүгінде Меркі аудандық, Андас батыр ауылдық емханасында еңбек етіп келе жатқан балалар дәрігері Ақшолпан Әбдіхалықова – өз ісін жетік меңгерген, білікті де тәжірибелі маман. 30 жылға жуық медицина саласында қызмет етіп келеді. Ол кішкентай ғана бүлдіршіндердің саулығын жіті қадағалап, дер кезінде көмек қолын созуға асығатын, кең жүректі балалар дәрігері.
Ақшолпан Әбдіхалықова Ақылбекқызы 1965 жылы Оңтүстік Қазақстан облысында дүниеге келген. Сол кездегі Ленинград қаласындағы педиатриялық медицина институтының 1989 жылғы түлегі. Еңбек жолын Жамбыл облыстық жұқпалы балалар ауруханасында дәрігер-инфекционист болып бастаған. 1992 жылдан бастап, бүгінге дейін Меркі аудандық, Андас батыр ауылдық емханасында балалар дәрігері ретінде қызмет етуде.
«Осы мамандықты таңдайтын жастар, біріншіден, шыдамды, сабырлы, мұқият, болуы қажет. Өйткен,і тоғыз жыл оқу деген оңай емес. Оған қоса, медицина университетінде оқытылатын сабақтар да жеңіл емес. Өзінің ісіне шын беріліп, күндіз-түні ізденіс үстінде жүретін, медицина деген ғылымның тереңіне үңіле білген адам ғана осы саланың нағыз маманы болып шыға алады. Ал нақты мақсаты жоқ мамандар бірінші, бесінші курс болсын, жарты жолдан тастап кетіп жатады. Ең бастысы – алға нақты мақсат қоя білу керек, сонда ғана адам алдынан қанша қиындықтар кездессе д,е жеңе біледі» — дейді ол.
Балалардың сүйікті дәрігеріне айналған Ақшолпан Ақылбекқызы қашан да әр аурудың қыр-сырына терең үңіліп, дәйекті диагноз қоюдың амалдарын жан-жақты қарастырады. Былдырлаған бүлдіршіннің бал тілін түсіну былай тұрсын, оның денсаулығына үңілу — тіптен бөлек. Оны тек педиатр мамандар ғана түсіне алады. Бүгінде оның отыз жылғы тамшылай төккен тері мен еселі еңбегі зая кетпегені анық.
—
