Бүгін астаналықтар әлеуметтік желіде қою түтіннің фотоларымен бөлісе бастады. Елорданың Төтенше жағдайлар департаментінің баспасөз қызметі бұл жағдайды сол жағалаудағы қураған ағаштардың өртенуінен деп түсіндірді.
Астана Төтенше жағдайлар департаменті 19 маусымда қураған ағаштың тұтанғаны туралы мәлімет келіп түскенін хабарлады. Таңғы сағат 9:12-де Астана қаласы Төтенше жағдайлар департаментінің бөлімшелері аталған орынға жетті.
«Өрт сөндірушілер жеткен соң Қорғалжың тас жолы мен Қосшыға қарай өтетін айналма жол арасында қураған ағаш жанып жатқаны анықталды», — деп хабарлады баспасөз қызметі.
Өртті сөндіруге Астана қаласы Төтенше жағдайлар департаментінің жеке құрамының 22 адамы мен бес техникасы, қала әкімдігінің суару машинасы жұмылдырылған.
