Қазақстан Республикасы Президентінің «Орталық атқарушы органдар басшыларының, әкімдердің, ұлттық жоғары оқу орындары ректорларының халыққа есеп беру кездесулерін өткізу туралы» 2016 жылғы 5 ақпандағы №190 Жарлығына сәйкес Жамбыл ауданында ауыл әкімдерінің есеп беру кездесулері басталғаны белгілі.
Қапал ауылында былтыр «Жұмыспен қамтудың жол картасы» бағдарламасы шеңберінде Атамұра, У.Қайназаров, Тұран, Игілік көшелерінде орта жөндеуден өтеді және биыл ауылға интернет желісі тартылады. «Транстелеком» мекемесімен келіссөздер жүргізіліп жатқанын айтты.
Алдағы уақытта ауыл тұрғындары мен мекеме басшылығы өзара келіскен жағдайда интернет желісі 
тартылады. Бұл туралы округ әкімі Бақыт Садырбаев ауыл тұрғындарының қатысуымен өткен есеп беру кездесуінде айтты.
Есепті баяндамасынан кейін тұрғындардың талап-тілегіне құлақ түрді.
Жиынға әлеуметтік желі (инстаграм) арқылы қатысқан тұрғын Нұрлан Қосыбаев кешкі уақыттарда электр желісі қуатының әлсіз болатынына байланысты жаңа трансформатор орнатылып берілсе деген тілегін тілге тиек етті. Ауыл тұрғыны Бақытжан Игіліков ауылға келетін жолдағы көпірді кеңейту қажет екенін сөз етіп, осы мәселені назарға алуын өтінді.
Тұрғындардың «Қапал ауылын кеңейту мақсатында жер телімдері беріле ме? 2,5 пайыздық жеңілдетілген несиені қалай алуға болады?» деген сауалдары жауапсыз қалмады. Округ әкімі бұл бойынша құзырлы мекемелерге сұраныс хат жолдайтынын, қажетті қаражат бөлінсе, тиісті жұмыстар жүргізілетінін жеткізді.
Соңынан сөз сөйлеген зейнеткер Есенгелді Ошақбаев округ әкімінің есебіне оң бағасын берді.
Жамбыл ауданы әкімдігінің баспасөз қызметі
