Жамбыл облысының ерекше орындар мен аудандарын аралауды ары қарай жалғастырамыз. Қазір Сіздердің танысатын аудандарыңыз Байзақ ауданының Кеңес, Сарыбарақ, Шахан ауылдары. Өткен аптада ғана Кеңес ауылының тумасы айтыскер — ақын Әсет Дүйсебаев қолына аққұсын қондырған болатын. Құстың қонған мекенінде біраз келеңсіз жәйттар кездесті.
Кеңес ауылының Теміртаев көшесі екі бөлікке бөлінген. Бірінші бөлігі асфальтті жол, екінші бөлігі — асфальты тесіліп, көліктің карбюраторы бұзылатын жол. Бірақ екеуі де бір көшеде. Жолға жарты қаражатты бөліп, жартысын алып қалмайтын шығар. Бөлінсе толық көшені жөндеуге бөлмей ме?!
Кеңес ауылына кіре берісіне 57 млн теңге бөлінген. Жұмыстың сапасыздығынан асфальт шашылып қалған. Бұл туралы ауыл тұрғындары мүделлі органдарға айтса да ешқандай нәтиже жоқ деп отыр. Қабылдағанда бәрі дұрыс болған шығар, бірақ кепілдемесі болу керек деп есептейміз. Бұл жұмысты аудандық «Рауан» ЖШС жеңіп алған, тек бұл жолды емес 185 млн жұмысына мердігер. Осы үшін аудандық тұрғындарға Сарыкемер-Базарбай-Торекелды аудандық маңыздағы автожолын орта жөндеуден өткізу — 21 млн, Байзақ ауылына кіреберісі аудандық маңыздағы автожолын орта жөндеуден өткізу — 21 млн, Түймекент-Ақжар аудандық маңыздағы автожолын орта жөндеуден өткізу — 20 млн, Жібек жолы-Жаңатұрмыс аудандық маңыздағы автожолын орта жөндеуден өткізу — 11 млн, Жетібай-Аққия-Төрткөл аудандық маңыздағы автожолын орта жөндеуден өткізу — 50 млн теңге қаражат берілгендігі туралы ақпаратты мемлекеттік сатып алу порталынан көріп отырмыз.
9 мамыр — Жеңіс күніне орай ауылда орналасқан Ұлы Отан соғысына арналған ескерткішке ат басын бұрдым. Шыны керек, жағамды ұстап қайтып едім, мені келді деп естіген аудандық әкімдік орын алған жәйттардың орнын түзетіп қойған фотоларын ұялы телефоныма түсіріп жіберді. Жедел жұмыс жасау деп осыны айту керек шығар. Жарайсыңдар деп айтқым келеді.
2017 жылдың сәуір айында барлық бұқаралық ақпарат құралдарында Жамбыл облыстық Қоғамдық кеңесі Кеңес пен Шахан ауылдарына ағын су жеткізу мәселесіне 30 млн теңге қаражат бөлгізді деген ақпарат тараған болатын. Соңын нәтижесі ретінде 25 жыл су бармаған ауылдар қызылша егуді бастапты. Судың механикалық арнасының тазаланғандығын өз көзімізбен көріп нәтижесін күзде байқайтын боламыз.
Шахан мен Сарыбарақ ауылдарының медициналық пункттерінің жабық тұруы қынжылтты. Жұмыс уақытысында ауданға жиналысқа кетті ме? Әлде толғағы келген әйелді қалаға апара жатыр ма? Шындығын білмедім. Не болса да басы ауырып, қан қысымыңызды өлшететін болсаңыз ауылдан медбике таппайды екенсіз. Ол ғимарат ашық тұрмаса,тұрғындар мен қонақтар барып көмек алмаса, ондай ғимаратты ұстап тұрудың қаншалықты қажеттілігі бар? Бұл сұраққа құзырлы орган басшылары жауап береді деген ойдамын.
Видеолар 3 мамыр күні сағат 16.20 мен 17.00 арасында түсірілген.
TURANINFO.KZ
