Бір ғасырдан аса тарихы бар мектепке Алаштың көрнекті қайраткерінің есімі берілді
Бүгін Тараз қаласындағы шаңырағы биік, ұстаздары озат, оқушылары талапты Әлихан Нұрмұхамедұлы Бөкейханов атындағы №1 мектеп-гимназиясында алғашқы қоңырау соғылды.
Биылғы ерекшелік — мектепке көрнекті қоғам қайраткері, Ресейдің жергілікті және қалалық қоғам қайраткерлері съезінің депутаты, Ресейдің I Мемлекеттік думасының және мұсылман халықтары съезінің депутаты, IV Мемлекеттік думаның мұсылман фракциясының Бюро мүшесі, Санкт-Петербор масоны, қазақтың 20 ғасыр басындағы ұлт-азаттық қозғалысының негізін салушы әрі көсемі, халқымыздың тұңғыш «Алаш» саяси партиясының ұйымдастырушысы және ұлттық Алашорда автономиялы үкіметінің төрағасы, ғұлама ғалым – ормантанушы, экономист, тарихшы, этнограф, әдебиеттанушы, аудармашы, әрі дарынды публицист — Әлихан Нұрмұхамедұлының есімі берілді.
Жүз жылдам аса уақыт бойы осы мектепте тек орыс тілінде сабақ жүргізілетін. Ал, 2007 жылдан бастап қазақ тілді сыныптар жасақталып, 2017 жылы, яғни биыл, қазақ тілді сыныптың табалдырығын 200-ден аса бала аттады.
Бүгінгі мерекелік шарада Ә.Бөкейханов есімі ұлықталып, әдеби өлеңдер оқылып, мектеп директоры Л.Қызылқұлова мен Тараз қаласы әкімдігі мәдениет және тілдерді дамыту бөлімінің басшысы Б.Тоқсанбаева жиналғандарға жылы лебіздерін жеткізді.
«Былтырғы оқу жылын біз 1314 оқушымен аяқтадық. Биыл бірінші сыныпқа тағы 290 бала келді. Бүгінгі таңда барлығы 1604 оқушы №1 гимназияда білім алады. Жыл сайын облыстық білім басқармасымен мектеп рейтингісі жүргізіледі. Былтыр біз облыс бойынша бірінші орынды иеленіп, облыс əкімі Кəрім Насбекұлы өз қолымен 500 мың теңгені құрайтын сертификатты табыс етті. Биыл біз қала мектептері арасынан бірінші орынға, облыс мектептері арасында — екінші орынға шықтық. Жыл сайын біз қала бойынша үздік үш мектептің, облыс бойынша — үздік ондыққа жəне республика бойынша үздік жүздікке кірудеміз» деп мәлімдеді Әлихан Бөкейханов атындағы №1 мектеп гимназиясының директоры Ләззат Әбілдәқызы.
Жаңа форматтағы оқуды енгізуге байланысты мектеп 5 күндік оқуға ауысты.
https://www.facebook.com/islambek.dastan/posts/1397191496996723
Исламбек Дастанұлы арнайы TURANINFO.KZ ақпараттық агенттігі үшін.
