Екібастұзда жоспарланған «Деректерді өңдеу орталықтарының алқабы» (Data Center Valley) әлемдік технологиялық және инвестициялық компаниялардың назарын аударып отыр. 1 қазанда Мемлекет басшысы Қасым-Жомарт Тоқаев өткізген бірқатар кездесулерде NVIDIA, General Atlantic және G42 компанияларымен осы жобаны дамыту мәселесі талқыланды. Бұған дейін Президент аталған бастаманы Қазақстан мен Орталық Азияның цифрлық инфрақұрылымының негізгі тіректерінің біріне айналдыру көзделетін стратегиялық жоба ретінде таныстырған.
NVIDIA келесі кезеңге қатысуға ниетті
NVIDIA вице-президенті Рев Лебаредянмен кездесуде жасанды интеллект, цифрлық технологиялар және есептеу инфрақұрылымы салаларындағы ынтымақтастық мәселелері сөз болды.
Мемлекет басшысы NVIDIA-ның жасанды интеллектінің жаһандық экожүйесіндегі рөлін атап өтіп, Қазақстан экономикасының басым салаларына AI технологияларын кеңінен енгізудің маңызын айтқан.
Қазақстанда NVIDIA технологиялары базасында екі суперкомпьютер кластері іске қосылған. Кездесуде Екібастұздағы «Деректерді өңдеу орталықтарының алқабына» ерекше назар аударылып, Рев Лебаредян NVIDIA-ның жобаның келесі кезеңіне қатысуға ниетті екенін жеткізген.
General Atlantic та Екібастұзға назар аударды
Президент General Atlantic компаниясының төрағасы әрі бас директоры Уильям Фордпен де кездесті. Тараптар инвестициялық ынтымақтастықты, технологиялық секторды және Қазақстандағы жасанды интеллект экожүйесін дамыту перспективаларын талқылады.
Ақорданың мәліметінше, General Atlantic қаржы технологиялары, электрондық коммерция, бағдарламалық жасақтама, жасанды интеллект, энергетикалық және цифрлық инфрақұрылым салаларындағы инвестициялық мүмкіндіктерді қарастырып отыр.
Компания Екібастұздағы Data Center Valley жобасына қатысуға нақты қызығушылық танытып отыр. Жоба AI, бұлтты есептеулер және цифрлық сервистер үшін ірі инфрақұрылымдық платформа құруға бағытталған.
G42 үшін де Екібастұз жобасы талқыланды
Қасым-Жомарт Тоқаев БАӘ делегациясымен кездесуінде де жасанды интеллект пен цифрландыру саласындағы ынтымақтастықты талқылады.
Президент Presight AI компаниясымен суперкомпьютерлік инфрақұрылым, Smart City және көлік қозғалысын бейнемониторингтеу жүйесі бағытындағы ықпалдастықты атап өткені көрсетілген.
Кездесуде G42 компаниясының Екібастұздағы «Деректерді өңдеу орталықтарының алқабы» экожүйесін құруға қатысу мүмкіндігі де қарастырылған. Президент осы кездесуде БАӘ өкілдері Сухейл Әл-Мазруи мен Мансур әл-Мансуриді Қазақстан–Әмірліктер қарым-қатынасын дамытуға қосқан үлесі үшін ІІ дәрежелі «Достық» орденімен марапаттады.
Екібастұз неге маңызды?
Data Center Valley тұжырымдамасы Екібастұздың энергетикалық мүмкіндіктерін цифрлық экономика қажеттіліктерімен байланыстыруды көздейді. Бұған дейін Ақорда жобаның мақсаты деректерді өңдеу орталықтарын, бұлтты сервистерді және жасанды интеллект инфрақұрылымын дамытуға арналған халықаралық деңгейдегі платформа қалыптастыру екенін хабарлаған.
Осылайша, бір күнде өткен жоғары деңгейдегі кездесулерде NVIDIA, General Atlantic және G42 секілді халықаралық компаниялардың Екібастұздағы бір инфрақұрылымдық жобаға қатысты жоспарлары мен қызығушылығы талқыланды.
Бұл ретте олардың қатысу деңгейі бірдей емес: NVIDIA келесі кезеңге қатысу ниетін білдірген, General Atlantic нақты қызығушылық танытып отыр, ал G42-нің жобаға қатысу мүмкіндігі қарастырылған. Сондықтан бұл компаниялар жобаның толық бекітілген инвесторлары деп айтуға әзірге негіз жоқ.
TURANINFO.KZ
