Жамбыл облысында прокуратура жүйесінде қызмет атқарған Мәлік Елетаевтың ұсталғаны туралы ақпарат тарады.
Қолда бар мәліметке сәйкес, Мәлік Елетаев ҚР Бас прокуратурасының Құқықтық статистика және арнайы есепке алу жөніндегі комитетінің Жамбыл облысы бойынша департаментінде аға прокурор қызметін атқарған.
Алдын ала мәлімет бойынша, ол 2026 жылғы 31 тамызда қызметінен босатылып, 3 қыркүйекте ұсталған.
Елетаевқа қатысты қылмыстық іс ҚР Қылмыстық кодексінің 190-бабы 3-бөлігінің 1 және 2-тармақтары бойынша қаралып жатқаны көрсетілген.
Аталған бап алаяқтыққа қатысты қылмыстық жауаптылықты көздейді. Дегенмен істің нақты мән-жайы, келтірілген залал көлемі және Елетаевқа қатысты қолданылған бұлтартпау шарасы әзірге біздегі мәліметте көрсетілмеген.
Редакция құзырлы органдардан ресми ақпарат алуға тырысады. Мәлік Елетаевтың кінәлі немесе кінәсіз екендігі заңды күшіне енген сот үкімімен ғана анықталады.
