Тараз қаласы №2 сотында судья А.Ш.Қорабаеваның төрағалық етуімен Қазақстан Республикасы ҚК-нің 296-бабының 1-бөлігімен (есірткі заттарымен өткізу мақсатынсыз заңсыз жұмыс істеу) айыпталып, сотқа берілген А.-ға қатысты қылмыстық ісі қаралды.
Сотталушы А., 19.04.2017 жылы сағат 18:00 шамасында «Арай-2» мөлтек ауданында орналасқан №3 мен 4 үйлердің ортасында жерде төрт бұрышты қағазға оралған «марихуана» есірткі затын тауып алған. Осы кезде есірткі затын медициналық емес тұтыну қылмыстық ойы туындап, заңсыз екендігін біле тұра, сағат 19:00 шамасында қоғамдық орын болып табылатын осы 3-4 үйлердің алдындағы ауласында автокөліктер тұрған қоршалмаған тұрақта бола тұра, аталған есірткі затты шегу арқылы медициналық емес тұтынған. Содан ол есірткі затын шегіп тұрған кезінде Тараз қаласы ІІБ КПБ-нің жедел уәкілдері оның жанына келіп өздерін таныстырған уақытта, шегіп тұрған темекіге оралған есірткі затының қалдығын белгісіз тұсқа лақтырып жіберген. Сол кезде Тараз қаласы ІІБ КПБ-нің жедел уәкілдері сотталушының жеке басын анықтау барысында оның үстінен өткір иістің шығып тұрғанын сезгендіктен, оны кезекші бөлім арқылы жеке басын анықтағаннан кейін Жамбыл облыстық наркологиялық диспансеріне жеткізіп, есірткі затын қолданғаны туралы куәландырған. 19.04.2017 жылғы № 2865 медициналық куәландыру қорытындысының негізінде А.-ның есірткі затты тұтынғаны анықталған.
Тараз қаласы №2 сотының 16.05.2017 жылғы үкімімен қылмыстық теріс қылық жасағаны үшін А. ҚР ҚК-нің 296-бабының 1-бөлігімен кінәлі деп танылып, оған 60 (алпыс) сағат қоғамдық жұмыс түріндегі жаза тағайындалды. Үкімнің орындалуын бақылау сотталғанның тұрғылықты мекен-жайы бойынша пробация қызметіне жүктелген.
Үкім заңды күшіне 01.06.2017 жылы енген.
TURANINFO.KZ
