Қазіргі уақытта «Қазақстан Халық партиясы», «Жалпыұлттық социал демократиялық партиясы» және «Байтақ» жасылдар» партиялары өз кандидаттарының тізімін бекітті. Сол тізімдерге Жамбыл облысынан ұсынылған үміткерлерге тоқталсақ.
Қазақстан халық партиясы (ҚХП) Құрылтай сайлауына 72 кандидаттан тұратын партиялық тізім ұсынды. Оның ішінде Жамбыл облысынан төмендегі азаматтар енгізілді:
- Ғалымжан Райылұлы Әбдірайымов – Тараз қаласының экс-әкімі;
- Рахман Сейілханұлы Аққозиев – Қазақстан халық партиясы Жамбыл облыстық филиалының төрағасы, құрылыс саласының басқарушысы, ІІМ ардагері;
- Эльмира Түгелбайқызы Әуезова – PhD докторы, «Атамекен» ҰКП жанындағы Алматы қалалық денсаулық сақтау салалық кеңесінің төрағасы;
- Әсел Әбілханқызы Жапарова – Тараз қалалық мәслихатының депутаты, «Алаш» ұлттық балаларды дамыту мектебінің басшысы.
Сонымен қатар, бүгін Жалпыұлттық социал-демократиялық партиясының (ЖСДП) XXV съезі өтті. Делегаттар партияның жаңа бағдарламасы мен жарғысын қабылдап, Құрылтай сайлауына арналған 33 кандидаттан тұратын партиялық тізімді бекітті.
Жамбыл облысынан бұл тізімге:
- Еркін Қайырбекұлы Әбдиев – маман, ЖСДП Жамбыл облыстық филиалы жастар қанатының жетекшісі;
- Ержан Каханович Дауренбеков – ЖСДП Жамбыл облыстық филиалының төрағасы енгізілді.
Ал, «Байтақ» жасылдар партиясы алдағы сайлауға 53 кандидаттан тұратын партиялық тізім ұсынды. Оның құрамында 41 ер адам, 12 әйел, 6 жас өкіл және 2 мүмкіндігі шектеулі азамат бар. Кандидаттардың орташа жасы – 46 жас.
Кәсіби құрамында 14 эколог, 11 экономист, 10 заңгер, 8 білім және ғылым саласының өкілі, 5 мемлекеттік қызметкер және 5 өзге сала маманы қамтылған. Сондай-ақ, 5 кандидат бұған дейін Мәжіліс депутаттығына үміткер болған, ал 2 кандидат қазіргі таңда мәслихат депутаты болып қызмет атқарады.
Жамбыл өңіріне қатысты маңызды жайттардың бірі – партия төрағасы Азаматхан Амиртаевтың Жамбыл облысы Тұрар Рысқұлов ауданының тумасы болуы.
Мақала Жамбыл облысы әкімдігі ақпарат және қоғамдық даму басқармасының мемлекеттік ақпараттық тапсырыс негізінде жарияланды.
