23 маусым – Мемлекеттік қызметшілер күні, Судьялар мен сот жүйесі қызметкерлері күні және Қазақстан Республикасы Полициясы күніне орай Мойынқұм аудандық мәдениет үйінде «Халыққа қызмет – абыройлы міндет» атты салтанатты мерекелік кеш өтті.
Мерекелік іс-шараға ауданның мемлекеттік қызметшілері, сот жүйесінің қызметкерлері, құқық қорғау органдарының өкілдері, ардагерлер мен қоғам белсенділері қатысты. Кештің негізгі мақсаты – мемлекет пен қоғам игілігі жолында аянбай еңбек етіп жүрген сала мамандарының еңбегін бағалап, олардың кәсіби мерекелерін лайықты деңгейде атап өту болды.
Салтанатты жиын барысында қатысушыларға мемлекеттік қызметтің, сот жүйесінің және полиция қызметінің қоғам өміріндегі маңызы ерекше екені атап өтілді. Бұл салалардың өкілдері елдегі заңдылық пен тәртіптің сақталуына, азаматтардың құқықтары мен бостандықтарының қорғалуына, мемлекеттік басқару жүйесінің тиімді жұмыс істеуіне және қоғамдық қауіпсіздіктің қамтамасыз етілуіне зор үлес қосып келеді.
Мерекелік кеште алғашқы болып сөз алған Мойынқұм ауданының әкімі Ермек Амангелдіұлы Карентаев кәсіби мереке иелерін құттықтап, олардың ауданның әлеуметтік-экономикалық дамуына қосып отырған үлесін ерекше атап өтті.
– Мемлекеттік қызметші, сот қызметкері және полиция қызметкері болу – үлкен жауапкершілік пен адалдықты талап ететін абыройлы міндет. Сіздер ел мүддесі жолында аянбай еңбек етіп, халықтың сенімін ақтап келесіздер. Әрқайсыңыздың еңбектеріңіз құрмет пен ризашылыққа лайық, – деді аудан әкімі.
Сондай-ақ аудан басшысы өз міндеттерін жоғары жауапкершілікпен атқарып жүрген бірқатар қызметкерлерді аудан әкімінің Құрмет грамоталары және Алғыс хаттарымен марапаттады.
Мерекелік жиында сөз алған аудандық мәслихат төрағасы Нұртас Ұзақұлы Саурықов та сала мамандарына жүрекжарды лебізін білдіріп, олардың кәсіби біліктілігі мен ел алдындағы адал қызметін жоғары бағалады. Өз сөзінде ол мемлекеттік басқару жүйесінің тиімділігі, сот төрелігінің әділдігі және қоғамдық қауіпсіздіктің сақталуы осы салалардағы мамандардың қажырлы еңбегінің нәтижесі екенін атап өтті.
Іс-шара барысында аудандық мәслихат төрағасы өз саласында үздік көрсеткіштерге қол жеткізген қызметкерлерге марапаттар табыстап, алдағы жұмыстарына табыс тіледі.
Кеш барысында Мойынқұм аудандық полиция бөлімінің басшысы Алмас Садықбайұлы Көпбаев сөз сөйлеп, полиция қызметкерлерін кәсіби мерекелерімен құттықтады. Ол құқық қорғау органдары қызметкерлерінің қоғамдық тәртіп пен азаматтардың қауіпсіздігін қамтамасыз етудегі маңызды рөліне тоқталып, қызметтік міндеттерін үлгілі атқарып жүрген бірқатар қызметкерлерге марапаттар тапсырды.
Салтанатты бөлімнен кейін мерекелік кеш мәдениет үйі өнерпаздарының қатысуымен ұйымдастырылған концерттік бағдарламаға ұласты. Көрермендерге патриоттық рухтағы әндер мен әсерлі музыкалық нөмірлер ұсынылды.
Концерт барысында Шаһархан Аяжан, Дүзбай Айдын және Рысқұлова Жібек сахна төріне шығып, туған елге, Отанға деген сүйіспеншілікті дәріптейтін әндерді орындады. Өнерпаздардың әсерлі өнері жиналған қауымға көтеріңкі көңіл-күй сыйлап, мерекелік кештің сәнін арттыра түсті.
«Халыққа қызмет – абыройлы міндет» атты мерекелік шара мемлекеттік қызметшілердің, сот жүйесі қызметкерлерінің және полиция қызметкерлерінің қоғам алдындағы жауапты еңбегін дәріптеп, олардың ел дамуы мен халық игілігі жолындағы қызметіне көрсетілген зор құрметтің айқын көрінісі болды. Мұндай іс-шаралар мемлекеттік қызметтің беделін арттырып, қоғам тыныштығы мен тұрақтылығын қамтамасыз ету жолында еңбек етіп жүрген мамандардың мәртебесін көтеруге ықпал етеді.
Материал «Мойынқұм ауданы әкімдігінің ішкі саясат бөлімі» КММ тапсырысы бойынша әзірленді.
