Зейнеп Ахметова музей қорына өзі тапсырған жәдігерлер қойылған экспозициялық залды аралап, әрбір құнды мұраның тарихына тоқталды. Ол жәдігерлерге қатысты естеліктерімен бөлісіп, батырдың тұлғалық, батырлық болмысын ашатын естеліктерімен, өнегелі өсиетімен бөлісті.
“Мен Зейнеп Ахметова ретінде өмір сүрген жоқпын. Мен Момышұлының келіні ретінде өмір сүрдім. Өйткені солай болуы керек. Нысанада тұрасың. Халықтың көзінен ештеңе де жасырын қалмайды. «Сен тас санағанды халық құм санайды», – дейді. Ата айтатын: «Қатарыңнан озсаң да, халықтан оза алмайсың. Халықтың алдында басыңды иіп жүр». Халықтың алдында басын игеннен жаман болған жоқ. «Жақсы адамның жақсылығын айт, бірақ жағымпазданба. Жағымпаздық – рухани құлдық», – дейді. Сұмдық сөз ғой. Былай қарасаң, қарапайым сөз ғой. «Жаман адамның жамандығын айтсаң да, жала жаппа», – дейді. Ата үшін мүлде жаман адам, жақсы адам деген болмайтын”, — деді Зейнеп Ахметова сөз барысында.
Зейнеп Ахметованы қарсы алу рәсіміне Жамбыл облысы әкімінің орынбасары Серік Сәлемов пен Жамбыл облысы әкімдігі мәдениет және тілдерді дамыту басқармасы басшысының орынбасары Гүлдана Серікбаева қатысып, құрметті қонаққа гүл шоқтарын табыстады.
Кездесу барысында Зейнеп Ахметова өңір журналистерімен жүздесіп, ашық сұхбат өткізді. Ол Бауыржан Момышұлы туралы жүрекке жылы, тағылымы мол естеліктерін айтып, журналистер тарапынан қойылған сауалдарға жан-жақты жауап берді.
Сондай-ақ, Зейнеп Ахметова алдағы күз айларында батырдың өз қолы тиген және өмірімен тікелей байланысты бірқатар құнды жәдігерлерді музей қорына тапсыруды жоспарлап отырғанын жеткізді. Бұл – музей қорын толықтырып, келушілер үшін тарихи мұраның мазмұнын одан әрі байыта түсетін маңызды қадам болмақ.
Айта кетейік, «Даңқ» залының екінші қабатында орналасқан «Бауыржан Момышұлы музейі» 2025 жылғы 9 мамырда Ұлы Жеңістің 80 жылдығы мен қаһарман қолбасшы Бауыржан Момышұлының 115 жылдығына орай ашылған болатын. Бүгінде музей қорында 540 бірегей әрі құнды жәдігер сақталған.
Экспозицияда батырдың туған ортасы мен балалық шағынан бастап, еңбек жолы, соғысқа дейінгі қызметі, майдандағы ерлігі, алған марапаттары, соғыстан кейінгі қоғам қайраткерлерімен байланысы, әдеби мұрасы мен қолжазбаларына дейін қамтылған. Мұнда қойылған заттай жәдігерлер, сирек фотосуреттер мен кітаптар келушілерді Бауыржан Момышұлының өнегелі өмір жолымен тереңірек таныстырады.
