Халықаралық отбасы күніне орай жарияланған есепке сүйенсек, 2015 жылдан бері тіркелген некелер саны 148,8 мыңнан 2025 жылы 116 мыңға дейін азайып, көрсеткіш 22%-ға дерлік қысқарған.
Бұл өзгеріс неке қию коэффициентінен де анық байқалады: егер он жыл бұрын әр мың адамға шаққандағы неке саны 8,48 болса, қазір бұл көрсеткіш 5,69-ды құрап отыр.
Өңірлік тұрғыдан алғанда, елордамыз Астана қаласы отбасын құру бойынша көш бастап тұр (1000 адамға 6,75 неке), бұл жастардың еңбек ету мақсатында бас қалаға көптеп шоғырлануымен түсіндіріледі.
Ал ең төменгі көрсеткіштер Қызылорда және Батыс Қазақстан облыстарында тіркелген. Мамандардың айтуынша, соңғы 20 жылдағы неке қиюдың ең жоғары деңгейі 2012-2013 жылдары байқалған. Қазіргі құлдыраудың басты себебі ретінде демографиялық толқын аталуда: 1980 жылдардағы көп балалы буыннан кейін, неке жасына бала туу көрсеткіші төмен болған 1990 жылдардың соңында дүниеге келген жастар жетті.
Оған қоса, қазақстандықтардың шаңырақ көтеру жасы да есейіп келеді. Соңғы он жылда алғаш рет некеге тұрудың орташа жасы ерлерде 27,9-ға, әйелдерде 25,3-ке дейін ұлғайған.
