Бұл бағыттағы жұмыстар Алматы өңірлік гарнизонында Бас штаб бастығы генерал-лейтенант Қаныш Әбубәкіровтің жетекшілігімен өтіп жатқан оқу-әдістемелік жиындарда пысықталуда.
Маңызды іс-шараға Арнайы операциялар күштерінен бастап Десанттық-шабуылдау әскерлеріне дейінгі барлық құрылымдардың өкілдері жұмылдырылып, олар бес негізгі бағыт бойынша жаңашыл тәсілдерді меңгеруде. «Бітімгер» оқу орталығында әскерлерді даярлаудың мүлдем жаңа үлгілері мен бригадалардың күнделікті қызметін тиімді жоспарлау жолдары іс жүзінде көрсетілді.
Бұл жаңғыру процесінде сержанттар құрамының кәсіби деңгейін көтеруге және бөлімшелерді басқаруда заманауи цифрлық шешімдерді енгізуге басымдық беріліп отыр. Әскери мамандар ұрыс даласындағы байланысты ұйымдастырудың озық әдістерін үйреніп, ұшқышсыз ұшу аппараттары, радиоэлектрондық күрес және әуе шабуылына қарсы қорғаныс сияқты өзекті мәселелерді дөңгелек үстел басында талқыға салды.
Сонымен қатар, қазіргі заманғы қақтығыстардың ерекшелігі ескеріле отырып, әскерлерді техникалық және тылдық қамтамасыз ету мәселелері де жан-жақты қарастырылды.
Генерал-лейтенант Қаныш Әбубәкіров жиынды қорытындылай келе, жеке құрамның жауынгерлік шеберлігі мен дене дайындығын уақыт талабына сай үздіксіз жетілдіріп отыру — басты міндет екенін қадап айтты.
