Редакциямызға Қазақстанның әр өңірінен ондаған ата-ана мен мұғалім шағымданды. Олардың айтуынша, «Таным талабы» журналы оқушыларды республикалық басылымға жариялаймыз деп ақша алып, уәде етілген материалдарды жарияламаған, ал төленген қаражатты қайтармаған.
Оқу орындары мен ата-аналардың айтуынша, журнал өкілдері мектеп мұғалімдері арқылы ата-аналарға хабарласып, балаларды «үздік оқушы» ретінде республикалық басылымға шығарамыз деп сендірген. Бір оқушы үшін алынған төлем 25 000 теңге, ал төсбелгі үшін қосымша 12 000 теңге болған.
Ата-аналардың шағымы бойынша қазір 110-нан астам арыз жазылған. Бәрінде проблема бір — материал жарияланбаған, журнал шықпаған, ал ақшаны қайтару мүмкін емес.
Ата-аналардың нақты мысалдары
1) Бородулина Анна (БҚО)
2024 жылдың шілдесінде қызы Юлияның материалын жариялау үшін 25 000 теңге төлегенін айтады.
«Бүгінге дейін (28.07.2025) мақала жарияланған жоқ, келісімшарттағы мерзім әлдеқашан өтіп кетті. Менеджерлер жауап бермейді, ақшамды да қайтармайды»,
— дейді ата-ана.
Анна ханым редакцияға жолдаған шағымында, жағдай шешілмесе сот пен мемлекеттік органдарға шағым түсіретінін жазған. Бірақ нәтиже болмаған.
2) Алдасугурова Айдана (Байқоңыр)
2024 жылы 29 қазанда журналға қызы Айбибіні жариялау үшін 25 000 теңге және төсбелгі үшін 12 000 теңге төлеген. Келісімшарт аяқталғанына бірнеше ай болса да, материал шықпаған.
«Менімен менеджерлер бастапқыда сөйлесті, соңғы хабар 27.11.2024 болды. Содан кейін байланыс мүлде үзілді. Көрсетілген мекен-жай Қызылорда қаласында жоқ, барсам редакцияның өзі жоқ болып шықты»
— дейді Айдана.
WhatsApp-тағы жабық чатта оның айтуынша, 150-ге жуық ата-ана дәл осындай жағдайға түскен.
Мәселенің басты түйіні
Шағымданушылардың барлығы бір сұрақ қояды:
– Бұл алаяқтық па, әлде орындалмаған міндет пе?
Бірнеше ата-ана полицияға арыз түсіргенімен,
тексеру баяу жүріп, нақты жауап ала алмай отыр.
Кейбір ата-аналар мектеп мұғалімдері де алданып қалғанын, олар да журнал өкілдеріне сенгенін айтады.
Мамандар не дейді?
ҚР ҚК 190-бабы («Алаяқтық») бойынша:
-
уәде етілген қызмет көрсетілмесе,
-
ақша қайтарылмаса,
-
мекенжай жалған болса —
бұл қылмыс құрамына толық сәйкес келуі мүмкін.
Ата-аналардың талабы
Жүзден астам ата-ана:
-
Төлемді қайтаруды
-
Материалдың қайда екенін түсіндіруді
-
Журналдың заңды мәртебесін жариялауды
-
Кінәлі тұлғаларды жауапкершілікке тартуды
талап етеді.
Редакциямыз бұл жағдайдың мән-жайын анықтап, мемлекеттік органдардан ресми түсініктеме сұрайды.
Егер сіз де осындай жағдайға тап болған болсаңыз — бізге жазыңыз.
