Бүгінгі күні аймақта 38 ұйым ресми түрде лицензия алып үлгерген. Оның ішінде 26-сы – мемлекеттік мекемелер, ал 12-сі – үкіметтік емес ұйымдар. Жалпы алғанда бұл ұйымдардың қызметін 4317 адам пайдаланып отыр. Лицензияланған құрылымдардың ішінде 7-еуі толық стационарлық қызмет көрсетсе, 15-і – жартылай стационарлық үлгіде жұмыс істейді. Ал 4-еуі уақытша болу түрінде қызмет ұсынса, 14 ұйым әлеуметтік көмек пен қолдауды үй жағдайында көрсетіп келеді.
Бұл деректер облыстық Өңірлік коммуникациялар қызметінің алаңында өткен баспасөз жиынында Еңбек және әлеуметтік қорғау комитетінің облыс бойынша департамент басшысы Аслан Оразбековтың баяндамасында жария етілді.
2025 жылғы 1 қаңтардан бастап Қазақстанда халықты әлеуметтік қорғау саласында арнаулы әлеуметтік қызметтерді лицензиялау рәсімі енгізілген болатын. Мұндағы басты мақсат – көрсетілетін қызметтің сапасын көтеру, мүгедектігі бар азаматтарды тиімді оңалтуға жағдай жасау және осы саладағы заңбұзушылықтарды азайту.
– Арнаулы әлеуметтік қызметтерді лицензиясыз көрсету заң бойынша қатаң тыйым салынған. Лицензиялаудың тағы бір артықшылығы – қызмет жан басына шаққандағы тариф бойынша қаржыландырылады. Демек, әлеуметтік қызметкерлердің еңбекақысы енді бұрынғыдай белгіленген айлық емес, нақты көрсеткен қызметінің көлеміне байланысты есептелетін болады, – деді Аслан Ұланұлы.
Лицензия алу үшін ұйымдар бірқатар талаптарға сай болуы тиіс: ғимарат санитарлық нормалар мен өрт қауіпсіздігі ережелеріне сәйкес келуі қажет; жеткілікті материалдық-техникалық база мен білікті мамандар құрамы болуы шарт; сондай-ақ қозғалысы шектеулі жандарға ғимарат қолжетімді етілуі керек. Өтініш беру үдерісі толықтай цифрландырылған. Барлық құжаттар «Әлеуметтік қызметтер порталы» (aleumet.egov.kz) арқылы рәсімделеді.
Қолданыстағы стандарттарға сәйкес арнаулы әлеуметтік қызметтердің бірнеше түрі қарастырылған: стационарлық жағдайдағы қызмет, жартылай стационарлық үлгі, уақытша болу және үйде көрсетілетін әлеуметтік көмек.
Аймақта лицензия алып, белсенді қызмет көрсетіп жүрген үкіметтік емес ұйымдардың қатарында «Мүгедектігі бар жастар қоғамы», «Сезім мүгедектер қоғамы», «Жамбыл облысы мүгедектерді әлеуметтік қорғау», «Элай-Құлан», «Амина» қоғамдық бірлестіктері мен Жуалы ауданындағы мүмкіндігі шектеулі балаларды оңалту орталығы бар.
– Облысымызда арнаулы әлеуметтік қызмет көрсетеміз деуші жаңа ұйымдарға айтарымыз – ең алдымен штат құрамы толық болуы, ғимарат талаптарға сай келуі, қажетті құрал-жабдықтар мен медициналық лицензиялар қамтамасыз етілуі тиіс, – деп атап өтті Аслан Оразбеков.
Ақпарат Жамбыл облысы әкімдігі ақпарат және қоғамдық даму басқармасының мемлекеттік ақпараттық тапсырыс негізінде жарияланды.
