Альянстың басты мақсаты – студенттердің қоғамдық белсенділігін арттыру, олардың білім алуына қолайлы жағдай жасау, әлеуметтік қолдауға мұқтаж жастарға көмек көрсету. Ұйым бұл бағытта нақты жобалар мен жүйелі жұмыстар атқаруда.
Соңғы үш жыл ішінде «Тараз» студенттер альянсы» мүмкіндігі шектеулі жастармен бірлесе отырып параволейболдан бірқатар спорттық шаралар ұйымдастырды. Оларға турнирлер, жолдастық кездесулер және бірлескен жаттығулар жатады. Қазіргі таңда бұл бастама тұрақты форматқа айналып, аптасына екі рет жаттығулар өтуде. Осы бағыттағы жұмыстардың нәтижесінде Жамбыл облысының параволейбол командасы Қазақстан Республикасының екі дүркін чемпионы атанып отыр.
Ұйым жұмысының тағы бір маңызды бағыты – жоғары оқу орындары жатақханаларындағы жағдайды жақсартуға арналған жоба. Студенттердің тікелей ұсыныстары негізінде қолға алынған бұл бастама нақты нәтижелерге қол жеткізді. Жатақханаларда жаңа асханалар жабдықталып, медициналық құрылғылар орнатылды. Сонымен қатар, газ плиталар, су жылытқыштар (аристондар), орындықтар сияқты тұрмыстық қажеттіліктермен қамтамасыз етілді.
«Тараз» студенттер альянсы» студенттік ортада белсенді азаматтық ұстанымды қалыптастыру, салауатты өмір салтын насихаттау және білім алушылардың әлеуметтік жағдайын жақсарту бағытында өз жұмысын жүйелі түрде жалғастыруда.
Ақпарат Жамбыл облысы әкімдігі ақпарат және қоғамдық даму басқармасы мемлекеттік ақпараттық тапсырыс негізінде жарияланды.
