Бұл – Жамбыл облысының жер-су атауларының шығу тарихын зерттеуге арналған және жыл басынан бері жүргізілген жүйелі жұмыстың жемісі.
Аталған жинақта өңірдің он ауданындағы 90-ға жуық жер-су атауына байланысты халық арасында сақталған көне әңгімелер топтастырылған. Аңыздар ел ішіндегі көнекөз қариялардан, бұрынғы басылымдар мен жергілікті кітаптардан жинақталған.
Ш.Мұртаза атындағы руханият және тарихтану орталығының директоры Жасұлан Әбдіхалықтың идеясымен басылым қазақ және ағылшын тілдерінде жарық көрді. Бұл бастама шетелдік оқырмандар мен өңірімізге келген туристер үшін таптырмас танымдық құрал болмақ. Жинаққа арнайы екі бірдей QR-код енгізілген. Біріншісі арқылы оқырман аңыздың толық нұсқасын оқи алады, ал екіншісі өңірге келген туристердің тарихи орындарға бағыт-бағдар алуына жол ашады. Бұл – туристік маршруттар үшін өте ыңғайлы шешім.
Кітаптың мазмұнын қалыптастырып, құрастыру жұмыстарымен айналысқан – орталық қызметкерлері Асылжан Шәйділдаев, Мадияр Ералыұлы және Ғазиза Ақмахан. Аңыздармен бірге жинаққа қажетті фотосуреттерді кәсіби фотограф Алтынбек Қартабай түсірген. Көркемдік безендіру барысында заманауи технологиялар, оның ішінде жасанды интеллект құралдары да қолданылған. «Әулиеата аңыздары» бірнеше мәрте ақылдастар алқасының кеңесінде талқыланып, өңделіп, толықтырылған соң жарыққа шықты. Жоба тек рухани мұрамызды сақтауға ғана емес, оны заманауи тәсілдермен жаңа буынға жеткізуге бағытталған.
