Баспасөз конференциясында аймақтағы техникалық және кәсіптік білім беру саласындағы жаңашылдықтар мен жетістіктер таныстырылып, 2025 жылдың «Жұмысшы кәсіптері жылы» ретінде жариялануына байланысты қолға алынған бастамалар талқыланды.
Баспасөз конференциясына БАҚ өкілдері, білім беру ұйымдарының басшылары, жұмыс берушілер, сарапшылар және қоғам белсенділері қатысты. Спикер ретінде сөз алған Техникалық және кәсіптік білім беруді дамыту орталығының директоры Есжанов Дархан Кеңесбекұлы Жамбыл облысында бұл сала бойынша атқарылып жатқан жұмыстарға тоқталды.
«Ел Президенті Қасым-Жомарт Тоқаев жастарды еңбекке баулу мен жұмысшы мамандықтарының мәртебесін көтеру қажеттігін атап өтті. Осы орайда, біз өңірдегі колледждерде жаңа білім беру бағдарламаларын енгізіп, дуальды оқыту жүйесін жетілдіруге күш салып жатырмыз. Сонымен қатар, еңбек нарығына қажетті мамандар даярлау үшін кәсіпорындармен серіктестікті нығайтудамыз», – деді Дархан Кеңесбекұлы.
Конференция барысында техникалық және кәсіптік білім беруді дамытуға бағытталған негізгі шаралар таныстырылды:
•Жаңа мамандықтар атласы жобасы аясында өңірде 68 жаңа мамандық енгізіліп, 17 мамандық жойылса, 41 мамандық трансформацияланбақ.
•Дуальды оқыту жүйесін жетілдіру мақсатында 30 колледж 120-дан астам кәсіпорынмен келісімшарт жасады.
•Облыстағы 5 жетекші колледж базасында салалық кластерлер құрылып, олардың негізінде 30 магниттік колледжге әдістемелік қолдау көрсетілуде.
•Колледж түлектерінің жұмыспен қамтылуын арттыру үшін жұмыс берушілермен ынтымақтастық күшейтілуде.
•WorldSkills Kazakhstan – 2024 чемпионатына қатысқан өңірлік студенттер 1 алтын, 1 қола медаль және 11 медальон иеленді.
Сондай-ақ, баспасөз конференциясында халықаралық тәжірибе алмасу, шетелдік оқу орындарымен серіктестік орнату және білім сапасын арттыру мәселелері қозғалды.
Шара соңында БАҚ өкілдері спикерлерге сұрақтарын қойып, саладағы жаңалықтар бойынша пікір алмасты. Жиын қорытындысы бойынша, техникалық және кәсіптік білім беруді дамыту бағытында кешенді жұмыстар жалғасатыны және білім сапасын көтеру үшін жаңа бастамалар қолға алынатыны айтылды.
Бұл бастамалар жұмысшы мамандықтарына қызығушылықты арттырып, жастардың еңбек нарығына бәсекеге қабілетті маман болып шығуына ықпал етеді деп күтілуде.
Жамбыл өңірлік коммуникациялар қызметі
