Париж Олимпиадасының чемпионы, дзюдодан үш дүркін Олимпиада жүлдегері, жерлесіміз Елдос Бақтыбайұлы Сметов және Дзюдодан «Қазақстан Респбуликасының еңбек сіңірген жаттықтырушысы», Елдос Сметовтың жеке бапкері, Қазақстан Респбуликасының «Құрметті спорт қызметкері» Ғалымжан Жамбылбекұлы Жылгелдиев Жамбыл облысы Өңірлік коммуникациялар қызметінің алаңына келіп, баспасөз брифингін өткізді.
Спортшы сұрақ-жауап форматындағы брифинте журналистердің сауалдарына жауап берді.
Елдос Сметовке «Мемлекеттен алған қаражатты қайда жұмсайсыз?» деген сұраққа жауап берді.
Әр спортшының арманы – артынан жақсы бір мектеп ашылса деген ой. Қызмет жасап, жинаған тәжірибені бөліскенге не жетсін!? Мемлекеттен әр спортшыға әртүрлі деңгейде берілетін қаражат бар. Әр адам өзінің жасап жатқан жұмысына қаражат алады. Ол қаражат — айдың аяғында түсетін айлықтарыңыз сияқты. Сол айлықты қалай жаратасың деп сұраса – қалай жауап берер едіңіз. Бұл жеке өмір ғой. Сол сияқты бұл әр адамның жеке өмірі Бұл менің отбасыма, еткен еңбегіме, төкен теріме, жеткен жетістігіме беріліп жатқан баға. Қалай жаратам, не істеп жаратам — жеке өміріме қатысты деп ойлаймын. Бұл төрт жылдық айлық сияқты. Жеке сұрақты қоюдың қажеті жоқ деп ойлаймын, – деді Елдос Сметов.
Айта кетейік, мемлекеттен Елдос Сметовке алтын медаль алғаны үшін 250 мың АҚШ доллары беріледі. Бұл теңгемен шаққанда 117 млн теңгеден асады. Сондай-ақ, спортшы алдағы уақытта спорттық мансабын жалғастырғысы келетінін айтып, келесі Олимпиадаға да баруы мүмкін екенін айтты. Әзірге қызметке тағайындалуды емес, еліміздің дзюдо спортын дамытқысы келетіндігін жеткізді.
Еске салсақ, Елдос Сметов 60 келіге дейінгі салмақта Париж Олимпиадасының чемпионы болды. Ол финалда француз балуанын жеңіп, спорттық мансабындағы Олимпиада жүлделерінің қола және күміс медалімен қатар алтын медаліне ие болды. Қазақстандық Елдос Сметов Парижде өтіп жатқан Олимпиада ойындарының чемпионы атанғаннан кейін Халықаралық дзюдо федерациясының (IJF) әлемдік рейтингісінде ТОП-5-ке кірді. Еске сала кетейік, бұдан бұрын Елдос Сметовке жерлестері Lexus 600 көлігі мен 5 бөлмелі пәтер сыйлағанын жазған едік.
Жамбыл облысы Өңірлік коммуникациялар қызметі
