Жамбыл облысының әкімі Ербол Қарашөкеевтің шалғай аудан — Мойынқұмдағы жұмыс сапары Айдарлы ауылындағы №2 орта мектептің күрделі жөндеу жұмыстарымен танысудан басталды.
Екі қабатты нысанның жөндеу жұмыстары ағымдағы жылдың мамыр айында басталған.
Ол үшін 248 млн. теңге қаржы қаралған. Мердігер «DaurenBuild» ЖСШ кесте бойынша жұмыстарды осы жылдың қазан айының 20-на дейін аяқтауы тиіс.
Жылыту жүйесі автономды, қатты отынға ынғайластырылған мектепке 350-ден астам бала тіркелген.
Алдағы жылыту маусымы үшін 260 тонна көмір жеткізілген.
Облыс әкімі құрылыстың сылбыр жүріп жатқанына назар аударып, мердігерге сапаны сақтай отырып, белгіленген мерзімде тапсыру керектігін ескертті.
Келесі кезекте, аймақ басшысы жақында ғана пайдалануға берілген Қызылтал ауылдық округіндегі су ғимаратына барды.
Жер асты су көзін пайдаланатын нысан арқылы 170 аула (877 адам) тіршілік көзімен қамтылуда.
Айта кету керек, елді мекенге таза ауыз су 30 жылдан кейін тартылып отыр.
Магистральдық және сумен жабдықтау желілерінің ұзындығы 14 шақырымнан асады.
Ербол Қарашөкеев нысанның қызметімен, қондырғылардың жұмысымен танысты.
Ауыл қарияларымен сөйлесіп, жағдайларын сұрап, судың сапасын тексерді.
Мемлекет басшысының «Барлық деңгейдегі әкімдердің халықпен кездесулерін өткізу туралы» Жарлығына сәйкес өткен кездесуде шалғай аудандағы ауылдықтар көкейлеріндегі сауалдарын жолдап, жауаптар алды.
Қызылтал ауылдық округінде өткен басқосуда аймақ басшысы облыстың әлеуметтік-экономикалық даму қорытындылары мен жоспарлы шараларға қысқаша тоқталып өтті.
— Ағымдағы жылдың қаңтар-тамыз айларының қорытындысымен экономикалық өсім 104,8 пайызды құрады. Өнеркәсіп өнімі көлемі 6,7 пайызға, негізгі капиталға салынған өнімнің көлемі 24,8 пайызға артты.
Сондай-ақ, тұрғын үй құрылысында 389,9 мың шаршы метр тұрғын үй пайдалануға берілді.
Өңірдегі босалқы жерлер санатындағы 397 мың гектар жайылым жер ауылдық округтерге бекітіліп, нәтижесінде елді мекендегі жайылым жерлер 363,5 мың гектардан 741 мың гектарға ұлғайды.
Игерілмеген және заң талаптарын бұза отырып пайдаланып келген 308,9 мың гектар жер мемлекет меншігіне қайтарылды. Ағымдағы жылы 200 мың гектар жерді қайтару жоспарлануда.
Жалпы, облыс бойынша жетіспейтін 164,0 мың гектар жайылым жер толығымен шешілетін болады,- деді облыс әкімі.
Ауылдық округ әкімі Жәнібек Айдарқұлов есеп беріп, елді мекенде атқарылып жатқан жұмыстар мен өзекті мәселелерді баяндады.
Келесі кезекте қызылталдықтар газ тарту, картадағы ауыл атын түзету, интернет байланысындағы мәселелерді көтерді.
Ербол Қарашөкеев тұрғындардың сауалдарына жауап беріп, кейбір мәселерді шешу жолдарын қарастыру бойынша тиісті тұлғаларға нақты міндеттер жүктеді.
Кездесуден соң облыс әкімі жоспардан тыс округтегі Б.Момышұлы атындағы орта мектебінің, дәрігерлік амбулаториясының қызметі және әкімдік ғимаратының жөндеу жұмыстарымен танысты.
Сондай-ақ, дәл осындай форматтағы кездесу Қызылотау ауылдық округінде де ұйымдастырылды.
Жиында округ әкімі Жандос Қуантаевтің есебі тыңдалды.
Мұнда жергілікті тұрғындар суармалы су, спорт кешенін салу, ауылдарды әлеуметтік игіліктермен қамту, мектептің асханасы мен шатырын күрделі жөндеу, жер беру, газ тарту, ауылдық клубты жөндеу, ауыз судың сапасына қатысты және тағы басқа мәселелерді көтерді.
Аймақ басшысы көтерілген барлық мәселе назардан тыс қалмайтынын, оларды заң аясында шешу үшін жауапты тұлғаларға тапсырмалар берді.
Кездесулерден соң облыс әкімі тұрғындарды жеке сұрақтарымен қабылдау өткізді.
Жалпы, айта кетейік, Мойынқұм ауданында бірқатар жобалар іске асырылып, ел игілігіне жұмсалуда. Мәселен, өткен жылы ауданда 2,6 млрд. теңгеге 25 жоба іске асырылса, ал ағымдағы жылы 50 жобаға 6,4 млрд. теңгеге қаралған.
Ербол Қарашөкеев аудан басшылығы мен ауыл әкімдеріне елді мекендерде шағын жобаларды жүзеге асыру, тұрғындарды тұрақты жұмыспен қамту, “Ауыл аманаты” жобасы аясында жан-жақты ақпараттандыру және түсіндіру шараларын жүргізу, санитарлық тазалықты сақтау, суармалы жерлерді тиімді пайдалану секілді мәселелерді назарға алып, жұмыстар жүргізу керектігін баса айтты.
Жамбыл облысының әкімі Ербол Қарашөкеев Мойынқұм ауданындағы Жаз-Ата саябағына барып, Екі мәрте Социалистік Еңбек Ері Жазылбек Қуанышбаевтың рухына тағзым етті.
Тұлға атындағы аудандық музейінің жұмысын көріп, ондағы құнды жәдігерлермен танысты.
Бұдан соң аймақ басшысы Б.Момышұлы атындағы орталық стадионға, №8 Мойынқұм колледжіне ат басын бұрды.
Облыс әкімі колледжді сақтап қалу, жұмысын жүйелі түрде жолға қою шалғай аудан үшін аса маңызды екенін атап өтті. Ол үшін жатақхананы күрделі жөндеуден өткізу керек. Жауаптыларға бұл мәселені уақыт созбай шешуді тапсырған аймақ басшысы өңірге қажетті мамандарды даярлау айрықша назар аудару керектігін тапсырды.
Келесі кезекте Ербол Қарашөкеев Мойынқұм ауылындағы Радай өзеніндегі көпірдің жай-күйін көрді. Жөндеуді қажет ететін нысанның шаруаларға су жеткізудегі маңызы зор.
Осыған көңіл бөлген облыс басшысы жауаптыларға мәселені шешу жолдарын жеделдетіп жүзеге асыру бойынша нақты міндеттер жүктеді.
Айта кетейік, көпірдің ұзындығы 110 метрден асады, ені 13 метрді құрайды.
Жобаны қаржыландыру бойынша өтінім республикалық және облыстық бюджетке ұсынылды десек, бүгінгі таңда аталған ұсыныс негізінде құны азайтылып, сметалық құжаттарын келісу үшін сәулет бюроға жолданған.
