Спикердің сөзінше VIII шақырылымдағы алғашқы сессия барысында Палаталардың 3 бірлескен отырысы, Сенаттың 12 және Мәжілістің 15 жалпы отырысы өткен. Онда 120-дан астам мәселе қаралған. Сондай-ақ Парламенттің қарауында 82 заң жобасы болса, соның ішінде 25 заң қабылданып, 13 заң күшіне енген,- деп жазады парламент мәжілісінің ресми сайты.
– Қазіргі сайланымның басты ерекшелігі – көптеген маңызды заң жобасының депутаттардың бастамасымен әзірленуі. Оларға сайлаушылардың талап-тілегі, мұң-мұқтажы, Ел Президентінің тапсырмалары арқау болды, – деді Е.Қошанов.
Депутаттар бастамашы болған заң жобаларының ішінде – заңсыз алынған активтерді қайтару, сұйытылған газ айналымын реттеу және тұрғын үй-коммуналдық шаруашылығы, онлайн-платформалар және онлайн-жарнама мәселелері, Кәсіптік біліктілік туралы заңдар бар. Мұнымен қоса, Ерлан Қошановтың айтуынша, электр самокаттардың көп қолданылуы адамдардың қауіпсіздігіне әсер етіп отыр. Сондықтан олардың жүрісін реттеу жөніндегі түзетулер Парламентте қызу талқыланған. Осы орайда Мәжіліс төрағасы депутаттар қабылдаған заң жаяу жүргіншілердің де, самокат жүргізушілерінің де қауіпсіздігін қамтамасыз ететінін айтты. Сонымен қатар Палата төрағасы бұрынғы Семей ядролық полигоны аумағын зерттеу мен қауіпсіздігін қамтамасыз ету мәселесі көптен шешімін таппай келе жатқан түйткілді жайттың бірі екеніне назар аударды. Бүгінде бұл мәселе заңнамалық деңгейде шешімін тапты.
Бұдан бөлек жиын барысында Парламентке келетін түрлі мемлекеттік орган басшыларының жолданған сауалдарға берген жауаптарының сапасы төмен екені айтылды. Сонымен қатар келесі сессия барысында ұлттық қордан бөлінетін төлемдер мәселесі жөніндегі заң жобасы бойынша жұмыстар жалғасатыны да сөз болды.
