А.ж. 13 қазанында «AMANAT» партиясының ғимаратында «Сыбайлас жемқорлық тәуекелдерінің картасындағы өзекті мәселелерді шешу жолдарын талқылау» тақырыбында дөңгелек үстел өтті. Іс-шара барысында Превенция басқармасының бас маманы А.Әжібаевтың облыстың сыбайлас жемқорылық тәуекелдерінің картасы бойынша баяндамасы тыңдалып, картаға енгізілген мәселелерді шешу жолдары талқыланды. Жамбыл облысының сыбайлас жемқорлық тәуекелдерінің картасы 5 негізгі бағытты қамтиды. Олар: жолдар мен инфрақұрылым, құрылыс, тұрғын үй, жер бөлу, тауарлардың тапшылығы мен бағаның өсуі. Осы бағыттар бойынша бүгінгі күнге дейін бірқатар жұмыстар атқарылды. ««Барысхан» алқабының 867 үйін ауыз сумен қамтамасыз ету мақсатында 241,0 млн.теңге бөлініп, су құбырлары салынып, пайдалануға берілген. Алайда, су қысымының жоғарылауы кезіндегі сапасыз жұмыстың нәтижесінде су құбырлары жиі (103 рет) істен шығуда, нәтижесінде жұмыс әлі күнге дейін «Тараз Су» мекемесінің балансына қабылданбаған. Қорыта келгенде, тұрғындар зардап шегуде. «Барысхан» алқабының халқы ауыз сумен қамтамасыз етілген сәттен бастап бір жылдан астам уақыт өтті (455 күн), осы кезеңде су құбырлары 103 рет зақымданды. Демек, тұрғындар 10 ай бойы сусыз болды деп болжауға болады. Департамент әкімдіктің, мердігердің, жобалаушының, «Тараз су» мекемесінің басшылығымен өткізген кездесулерінің нәтижесінде арнайы топ құрылды. Топ жұмысының қорытындысы бойынша 15,3 млн. теңгеге ақаулар анықталды. Қазіргі таңда қалпына келтіру жұмыстары жүргізілуде», — атап өтті Айбек Әжібаев.
Бұдан бөлек, жиында тұрғын үй қатынастары саласында ЖАО-ның құрылымдық бөлімшелері тарапынан «Тұрғын үй қатынастары туралы» заңнамада көзделген кезекте тұрғандардың тізімдерін өзектендіру бойынша іс-шаралар жүргізілмейтіндігі туралы айтылды. Облыстық сыбайлас жемқорлыққа қарсы іс-қимыл департаментінің мәліметіне сәйкес, жүргізілген мониторингпен кезектен шығаруға жататын 5 725-тен астам кезекте тұрғандар анықталған (257 қайтыс болғандар, әртүрлі жылжымайтын мүліктері бар 3 415, мұқтаж ретінде есепке қойылғаннан кейін некеге тұрған 1 955, басқа мемлекеттерде тұрады 17, Жамбыл облысында тіркелмеген 81). Аталған мәселе бойынша Тараз қаласы мен аудандардың әкімдеріне мониторинг нәтижелері жолданып, Департаменттің араласуы нәтижесінде кезектен 1 075 адам алынған. Қалған 4 650 бойынша қазіргі
уақытта кезектен шығару бойынша осындай іс-шаралар жүргізілуде.
Кездесуге «AMANAT» партиясының өкілдері, азаматтық қоғам белсенділері, үкіметтік емес ұйым мен жастар қоғамдық бірлестік жетекшілері және сыбайлас жемқорлыққа қарсы қызмет мамандары қатысты.
