Жамбыл облысында жыл басынан бері 10 сыбайлас жемқорлыққа қарсы мониторинг жүргізіліп, оның қорытындысымен 23 сыбайлас жемқорлық тәуекелдері анықталды. Мониторингпен ауылшаруашылық техникаларды тіркеу, елді мекенді сумен қамтамасыз ету, арт спорт саласы, автокөліктерді бастапқы тіркеуден өткізу бағытындағы құқықбұзушылықтар белгілі болды.
Бұл туралы ӨКҚ баспасөз алаңында Жемқорлыққа қарсы іс қимыл агенттігінің Жамбыл облысы бойынша департаменті басшысының бірінші орынбасары Мақажанов Ернар айтты. «Мысалы айтатын болсақ, мониторинг нәтижесінде агроөнеркәсіптік кешен субъектілерін субсидиялауға бөлінген бюджет қаражатын ауыл шаруашылық басқармасының лауазымды тұлғаларымен ұрлау дерегі анықталып, департаменттің тергеу қызметімен сотқа дейінгі тергеп-тексеру жүргізілді. Бүгінгі таңда ҚР ҚК 190-бабы 3-бөлігінің 1-тармақшасы бойынша қылмыстық іс сотқа жолданды.
Онымен қоса, күнделікті «Сатып алудың бірыңғай терезесі» арқылы мемлекеттік сатып алуға мониторинг жүргізілуде. Жолданған ұсыныстар негізінде мемлекеттік органдарының мемлекеттік сатып алу жоспарлары қайта қаралып 326,0 млн теңгеден астам бюджет қаражаты үнемделді», — деп атап өтті спикер.
Ернар Әбсейітұлының айтуынша, Меркі ауданы әкімдігінің мәдениет және тілдерді дамыту бөлімінің мәдениет үйлері мен клубтарының орталықтандырылған жүйесі, 2 мың бірлік ыдыс – аяқты 24 млн теңгеге сатып алмақ болған. Ұсыныс негізінде жоспар қайта қаралып, 23,9 млн. теңге үнемделді.
«Сол сияқты, Қаратау қаласы әкімінің аппараты жалпы соммасы 7,5 млн. теңгеге 160 дана кабельдік құдық люгын сатып алмақшы болған, департаменттің ұсынысымен бағалары қайта қаралып 1,9 млн. теңге бюдет қаражаты үнемделген. Мұндай мысалдар аз емес. Аталған тәжірибе бұзушылықтың салдарымен емес, оны жоспарлау барысында алдын алуға арналған», — деді департамент өкілі.
