Жамбыл өңірінде ара шаруашылығын дамытып, бал өндірумен айналысатын омарташылардың саны артып келеді. Солардың бірі қордайлық – Жанат Көрпебаев.
Бал таңдаулы тағамның бірі екені жасырын емес. Бүгінгі күнге балдың 1,5 келісі 3000 теңгеге саудаланады. Бұл дегеніміз өнімнің табиғи жолмен дайындалғанының көрсеткіші.
Қордай ауданында ара шаруашылығын қолға алған омарташы Жанат Көрпебаев игілігі мол істі дөңгелетіп отыр. Аталған кәсіпке 20 жыл бұрын бет бұрған омарташы қазіргі таңда аудандық омарташылар қауымдастығының төрағасы.
Кәсіпкер басында бірнеше ұя қойып, ісін әуесқой ретінде бастаған. Тек бертін келе, мемлекет ара шаруашылығын сақтау және дамыту жағына ден қойғаннан соң, ол бал бизнесіне белсенді түрде кірісті. Бүгінгі күнге асыл тұқымды 150 ара отбасы бар бұл ара шаруашылығы өңірдегі ірілердің бірі болып саналады. Мұнда жылына 4 тоннадан астам тауарлық бал өндіріледі. Сонымен қатар, Жанат Көрпебаев кәсібін дамыту үшін грант алған. Осы мақсатта арнайы курстан өтіп, теориялық білімін жетілдірген. Қазір омарташы «Атамекен» кәсіпкерлер палатасының аудандық филиалы ұйымдастырған арашылар курсында дәріс береді.
Омарташы алдағы уақытта апитерапиялық сауықтыру кешенін ашуды жоспарлап отыр. Кешенге келушілер үшін тегін демалу, ем алу мүмкіндігі қарастырылады. Айта кетсек, апитерапия тірі аралармен және ара шаруашылығы өнімдерімен емдеу, бұл ем түрі күйзеліс, депрессия, қан қысымының көтерілуі, иммунитеттің төмендеуі, жүрек-тамыр аурулары сынды ауруларға шипа болып табылады.
— Біздің өңірде апитерапия орталығы жоқ. Бұл емнің түрі ағзаны жалпы сауықтыруға септігін тигзеді. Ұялардың ішіндегі ауа прополиске қаныққан, оның да шипалық қасиеттері көп. Сонымен қатар,омарташылық саласында бірқатар проблемалардың бар екені де жасырын емес. Көбіне олар селекциялық-тұқымдық жұмыспен, экспортты, табиғи бал брендін ілгерілетумен байланысты — дейді жоспарымен бөліскен омарташы.
Дереккөз Жамбыл облысының өңірлік коммуникациялар қызметі
