Ұлы Абайдың «Адамзаттың бәрін сүй, бауырым» деген өсиеті – биылғы Волонтер жылының туына іспеттес. Атаулы жылға арналған шараларда Президент Қасым-Жомарт Тоқаев «біреуге қолұшын созып, қолдау көрсету – қанымызға сіңген қасиет. Халқымызда осындай береке-бірлікке шақыратын Асар дәстүрі бар. Бұл – ғасырлар бойы құндылығын жоймаған ата салтымыз» деген еді
Осы ретте аудан еріктілері де жыл бойы тынымсыз еңбек етті, ерлігі елеусіз қалмады. Сөзіме дәлел күні кеше аудан әкімінің кіші мәжіліс залында салтанатты жиын өтті. Жыл көлемінде Мемлекет басшысы нақтылап берген жеті бағыт бойынша ерікті түрде қызмет атқарып, тағлымы мол, өнеге мен тәрбиенің парасат пайымын көрсете білген «Еріктілер» жылының мерекелік шарасын аудан әкімінің орынбасары Олжас Баққараев ашып, өңірде ерен еңбек етіп жүрген жастарды аудан әкімінің Алғыс хатымен үздік ерікті, белсенді жастарды марапаттады. Олардың қатарында Айдана Қыдырхан, Наргиза Құлбаева, Ералхан Ермахан, Жансұлу Жексенбай, Алима Қалисаева, Ұлболған Сансызбаева, Нұрхат Ахмет, Абылай Бекетов, Бекнұр Қасымбеков, Нұрбек Өмірбеков, Әдебиет Рапық, Айдар Сейітқанов сынды белсенділер бар және бұл бір парасы ғана.
