ЖАМБЫЛДА БІРҚАТАР ШАРУА ҚОЖАЛЫҚТАР СУБСИДИЯЛАРЫН ҚАЙТАРУЫ МҮМКІН

2019 жылдың 30 қазанында мемлекеттік қызмет көрсету мәселелер жөніндегі ведомствоаралық жұмыс тобының отырысы өтті. Онда Қазақстан Республикасы Сыбайлас жемқорлыққа қарсы іс-қимыл агенттігі Жамбыл облысы бойынша департаментімен бірігіп облыстық ауылшаруашылығы басқармасының субсидиялар берумен байланысты қызметіне жүргізілген талдау жұмыстарының қорытындысы қаралды. Яғни, сыйымдылығы бір уақытта кемінде 1000 бас болатын бордақылау алаңдары үшін бұқашықтарды бордақылау шығындарын арзандатуға және қозыларды өткізу құнын арзандатуға қатысты мәселелер көтерілді.
2019 жылдың 9 айында бірқатар шаруашылыққа жоғарыда аталған бағыттар бойынша 106343,4 мың теңге субсидия берілген.
Осы субсидияларды беру процедураларын реттейтін Стандарттар мен қағидаларда, субсидия алу үшін ұсынылатын өтінімдердегі мәліметтердің дұрыстығын шаруашылық субъектілерінің өздері растайды деп көрсетілген.
Алайда, талдау барысында аталған нормаларды теріс пайдаланған «Бірлік», «Ақ-барс» шаруа қожалықтары, «Меркі асыл тұқымды зауыты» АҚ, «Гамбург» ЖШС өз өтінімдерінде дұрыс емес мәліметтер көрсетіп субсидиялар алғандығы анықталған.
Отырыс қорытындысы бойынша ауыл шаруашылығы басқармасына субсидия алуға ұсынған өтінімдерді қайта қарап, дұрыс емес мәлімет ұсынған шаруа қожалықтарға берілген субсидияларды қайтару бойынша шаралар қабылдау ұсынылды.