Өткен жылы өңірлік филиал тарапынан 124 келісімшарт жасалып, бас-аяғы 129 жобаға оң нәтиже берілген. Бұдан бөлек, есепті кезеңде жамбылдық жолшылар 999 рет іссапарға шығып, бас-аяғы 392 нысанға инспекциялық тексеру жұмыстарын жүргізген. Нәтижесінде жол-құрылыс материалдарының 3129 данасынан үлгі алынып, сынамадан өткізілген. Сәйкесінше, жол-құрылыс материалдарының 1007 данасы нормативтік талаптарға сай келмейтіндігі анықталған. Өз кезегінде барлық анықталған ақаулар бойынша тапсырыс беруші мен мердігер ұйымдарға бас-аяғы 221 хат жолданған.
Айта кетейік, былтыр облыста өңірлік жол инфрақұрылымын дамыту мақсатында жергілікті маңызы бар автожолдар мен елді мекен көшелерін жөндеуге 26,8 миллиард теңге бөлінген. Осынау қаражат есебінен 16,5 шақырым көше жолдары мен 1 көпірдің құрылысы жүргізіліп, 3 шақырым жол қайта жаңғыртудан және 690,4 шақырым жол орта жөндеуден өтті. Оның ішінде, облыстық маңызы бар жол – 95,9, аудандық маңызы бар – 88,1 және елді мекен көшелеріндегі жол – 506,4 шақырымды құрайды.
