Апта басында «AMANAT» партиясы ауқымды экологиялық акция – «Таза Қазақстан» Road-эстафетасын бастаған болатын.
Астана қаласынан шығып Қарағанды облысы арқылы жол жиегін тазалап келе жатқан топ Жамбыл облысына да жетті. Күре жолдың жиегін тазалаушы аманаттықтарды жамбылдықтар Қарағанды облысы мен біздің аймақтың шекаралас аймағынан тосып алды. Олардың қатарына жамбылдық аманаттықтар мен «Жастар Рухы» жастар қанатының волонтерлері, ҚР Парламентінің Мәжіліс депутаттары, облыстық және аудандық мәслихат депутаттары мен экологтар қосылып Алматы облысына дейінгі аралықты тазалауға үлес қосты. Тазаланған жолдың жалпы ұзындығы 224 шақырымды құрайды.
«Жастар Рухы» жастар қанатының төрағасы Ақерке Искандерованың айтуынша, осы аптада партияның жүздеген белсендісі мен волонтерлері еліміздегі экология мәселесіне, табиғаттың ластануына, вандализм көріністеріне қоғам назарын аударуға күш салады. Сондай-ақ, ол өз сөзінде жол бойынан жиналған қоқыс қайта өңдеуге жіберілетінін жеткізді. «Біздің мақсатымыз — жастар арасында экологиялық мәдениетті қалыптастыру. Road-эстафетасына ел жастары қолдау көрсеткені қуантады. Аптап ыстыққа қарамастан белсенділердің көңіл күйі жақсы. Ақмола облысынан бастау алған эстафетаның алғашқы екі күндігінде шамамен 50 тонна қоқыс жиналды. Атап өтерлігі, жиналған қоқыстар қайта сұрыпталуға жіберіледі. Бұл күндері қазақстандықтардың «Қоқысты сыйлыққа айырбаста» акциясы аясында шыны, қағаз, металл және пластик қалдықтарын өткізіп, оны имидждік сыйлықтарға айырбастауға мүмкіндігі бар. Жалпы, эстафета шеңберінде жан-жақты жұмыстар жүргізілуде. Соның бірі — тарихи-мемориалдық кешендер аумағын вандализм іздерінен тазарту. Біз жол бойындағы еңселі ескерткіштерді хал-қадірімізше ретке келтіріп, вандализммен күреске өз үлесімізді қосып келеміз. Шын мәнінде, қоршаған ортамызда күл-қоқыс өте көп. Сол себепті, жастар атынан барлығыңызды экологиялық орта құруға шақырамын», — деді Ақерке Нұрғалиқызы.
