Жедел мәліметтерге сәйкес, Жамбыл облысының көлік жолдарында тек 4 айдың қорытындысы бойынша 344 жол-көлік оқиғалары тіркелген, онда 40 адам қаза тауып, 489 адам түрлі дәрежедегі жарақат алған.
Жамбыл облысының аумағы арқылы өтетін Батыс Еуропа-Батыс Қытай автожолы қалалар мен мемлекеттер арасындағы транзиттік автомашиналардың қозғалысы үшін көлік дәлізі болып табылады. Көлік құралдарының саны тұрақты түрде артуда, сондай-ақ жүргізушілер жиі ұзақ сапарларға шығуда. Автокөліктерді шамадан тыс жұмыс жағдайында басқару жағдайлары жиі кездесуде.
Мәселен, Меркі ауданындағы жергілікті маңызы бар автожолда 34 жастағы жүргізушінің басқаруындағы Тайота Камри маркалы автокөлігі Тараздан Меркі ауылына қарай бағыт алып келе жатқанда қозғалмайтын
кедергі — бағанамен соқтығысқан.
Аталған ЖКО салдарынан түрлі дене жарақаттарын алған жүргізуші ауруханаға жатқызылды.
Кейін белгілі болғандай, ер адам өткен тәулікте ұйықтамаған және шаршағанына қарамастан, жақын маңдағы ауылдағы туыстарына бару үшін рульге отырған. Жолда қатты шаршағандықтан рульде ұйықтап қалып, жол- көлік оқиғасы орын алған.
Аталған деректер тек жеңіл автомобильдердің ғана емес , сондай-ақ үлкен жүк көліктерінің қатысуымен де орын алуда.
Жол-көлік оқиғаларының алдын алу, сондай-ақ жолдарда азаматтардың өмірі мен денсаулығын сақтау мақсатында Жамбыл полицейлері ағымдағы жылғы 4-6 мамыр аралығында жол қозғалысының барлық қатысушыларына жадынамалар мен бүктемелер таратып, Жол қателіктерді кешірмейді! акциясын өткізуде.
Акция барысында тәртіп сақшылары жүргізушілерді ауырған күйде, мас немесе шаршаған жағдайда рульге отырмауға, қауіпсіздік белдіктерін пайдалануға, жылдамдық режимі мен қашықтықты бұзбауға, сондай-ақ өмір мен денсаулықты сақтау үшін жол қозғалысының өзге де ережелерін сақтауға шақырады.
