2024 жылдың 1 қазанында Жамбыл облысы ТЖД Өрт сөндіру және авариялық-құтқару жұмыстары қызметінің Тараз қаласы №2 мамандандырылған өрт сөндіру бөлімінің мәжіліс залында «Адал еңбек — таза табыс!» тақырыбында слет ұйымдастырылды. Аталған шараны өткізудегі негізгі мақсат азаматтық қорғау саласы мамандарының кәсіби құзыреттілігін арттыру және тәжірибе алмасу, жұмысшы жастардың оң имиджін қалыптастыру. Шара барысында Кадр және тәрбие жұмысы бөлімінің бастығы азаматтық қорғау майоры Мадина Гарифова жас қызметкерлер мен тәжірибелі мамандардың тәжірибе алмасуы сипатында өрбитін бүгінгі слеттің жыл сайын өткізіліп отыруы үрдіске айналғандығын тілге тиек етті.
Жамбыл облысы әкімдігінің жастар саясаты мәселелері басқармасының «Жастар ресурстық орталығы» КММ заңгер кеңесшісі Жолдасбай Фарида Жапановна слетке қонақ ретінде қатысты. Шара барысында қызметкерлермен «Адал еңбек — таза табыс!» тақырыбы кеңінен қозғалып, сондай-ақ азаматтық қорғау қызметінің жауапты қызметтердің қатарында екендігі, сондай-ақ қызметпен халық игілігі жолында атқарылған жұмыстары сөз болды.
Өрт сөндіруді ұйымдастыру және өрт сөндірушілерді дайындау бөлімінің бастығы, азаматтық қорғау подполковнигі Жомарт Бекболат өрт сөндіру қызметінің күрделілігіне тоқталып, жас қызметкерлер мен тәжірибелі мамандардың өзара қарым-қатынасын арттыратын мұндай шараның маңызы зор екендігін атап өтті. Одан әрі Байзақ ауданындағы жарылыс апатына қатысушыларға микрофон ұсынылып, ерлікпен қаза болған батырлардың есімдері аталды.
Слет барысында қазіргі таңдағы маңызды мәселелердің бірі 2024 жылғы 6 қазанда өтетін Республикалық референдум туралы және аталған референдумда қозғалатын «Сіз Қазақстанда атом электр станциясын салуға келісесіз бе?» деген сауал бойынша жастарға сұрақ қойылып, жас қызметкерлердің ойлары жан-жақты талқыланды. Ал одан әрі жас қызметкерлер «Халық қаһарманы» Мейіржан Айманов атындағы Тараз қаласы №2 мамандандырылған өрт сөндіру бөлімінің мұражайындағы тарихи жәдігерлермен танысты. Шара одан әрі «Тектұрмас» этнотарихи кешенін аралау бойынша экскурсияға жалғасты.
Жамбыл облысы ТЖД Өрт сөндіру және авариялық-құтқару жұмыстары қызметінің Қоғаммен байланыс тобы
