Атмосфералық ауаның автокөлікпен ластануы облысымыздағы және Тараз қаласындағы негізгі экологиялық проблемалардың бірі болып табылады.
Табиғат қорғау заңнамасын орындау және автокөлік құралдарының қоршаған ортаға зиянды заттар шығарулары бойынша экологиялық қауіпсіздігін қамтамасыз ету мақсатында облыс орталығында Тараз қаласы Полиция басқармасының ЖПҚ жол-патрульдік полиция батальонының қызметкерлері газ және түтін шығарындылары кезінде ластаушы заттардың мөлшері нормадан асатын қалалық автобус жүргізушілерін анықтау бойынша жұмыстар жүргізді.
Тек бір күнде полиция қызметкерлерімен ҚР ӘҚБтК 334-бабының талаптарын бұзған тұлғаларға қатысты (жеке тұлғалардың автомотокөлік және басқа да жылжымалы құралдар мен қондырғыларды пайдалануы барысында шығарындысында ластаушы заттардың болуы, сондай-ақ олар жұмыс кезінде шығаратын шудың деңгейі белгіленген нормативтерден асып кетуі) 31 әкімшілік хаттама толтырылды. Ал 2019 жылдың басынан бері барлығы 691 қоғамдық көлік жүргізушісіне қатысты әкімшілік материалдар толтырылды.
Жамбыл облысы Полиция департаментінің Баспасөз қызметі
