Тараз қаласында «Қазақстан-2050» Демократиялық күштері аймақтық коалициясының отырысы өтті

«Нұр Отан» партиясы Жамбыл облыстық филиалының ұйымдастыруымен «Қазақстан-2050» Демократиялық күштері аймақтық коалициясының отырысы өтті. Онда елімізде жүргізілгелі отырған Конституциялық реформаны қолдауға қатысты Үндеу жарияланды.
Басқосуға ҚР Парламенті Мәжілісінің депутаты Байділдә Жылқышиев, коалиция мүшелігіндегі партиялардың жеткешілері мен белсенділері, үкіметтік емес ұйым және Қазақстан халқы Ассамблеясының өкілдері, мәслихат депутаттары, жоғары оқу орындарының басшылары, бастауыш партия ұйымдарының төрағалары мен белсенді жастар қатысты.
Кеңес отырысына төрағалық етіп, жүргізіп отырған «Нұр Отан» партиясы Жамбыл облыстық филиалы төрағасының бірінші орынбасары Мұратхан Шүкеев әуелі Елбасы Н.Ә.Назарбаевтың сарабдал саясаты нәтижесінде еліміздің бүгінгі жетістіктерін жан-жақты баяндады. Сондай-ақ жиынға қатысушыларды Жолдауда айтылған міндеттерді жүзеге асыруға және Елбасы Үндеуін қолдауға шақырды.
Мұнан соң ҚР Парламенті Мәжілісінің депутаты Байділдә Жылқышиев сөз тізгіндеп, Елбасы Н.Ә.Назарбаевтың әр жылдардағы Жолдауларында кезек күттірмейтын маңызды мәселелерді тілге тиек етті. Сонымен қатар биылғы «Қазақстанның үшінші жаңғыруы: жаһандық бәсекеге қабілеттілік» атты Жолдаудың ерекшеліктеріне тоқталып өтті. Жолдауда атап көрсетілген Қазақстанның үшінші жаңғыруы дүние жүзінде болып жатқан дағдарыстан айналып өту ғана емес, одан өзге де өзгерістердің бастауы, – деді Байділдә Жылқышыұлы. Сонымен қатар сөз барысында мәжілісмен Елбасы Н.Ә.Назарбаев билік тармақтары арасында өкілеттіктерді қайта бөлу мәселелері жөніндегі Үндеуіне де кеңінен тоқталып өтіп, оны қолдауға шақырды.
Кеңес отырысында коалция мүшелігіндегі барлық партия өкілдері ойларын ортаға салып, үкіметтік емес ұйым өкілдерінің пікірлері тыңдалды. Сондай-ақ олар алға қойылып отырған мақсаттың ортақ, Мемлекет басшысының Конституция кепілі ретінде қабылдаған жаңа тарихи шешімін қолдау, қазақ қоғамындағы саяси тұрақтылық пен экономиканың қарқынды дамуына бірлесе үлес қосу қажеттігін жеткізді.
Жиын қорытындысы бойынша аймақтық коалиция өкілдері Тараз өңірінің тұрғындарына Еліміздің Тұңғыш Президентінің көшбасшылығы және жалпы әлемдегі мықты, табысты мемлекет ретінде тәуелсіз Қазақстанды құрудағы президенттілік институтының тарихи маңызы, Қазақстан Президентінің саяси жүйені одан әрі демократияландыру үшін мемлекеттік билік тараптары арасында өкілеттіктерді қайта бөлу, сондай-ақ «Бес институционалды реформаны» жүзеге асыру, еліміздің әлемдегі 30 жетекші мемлекеттің қатарына кіру бойынша «Қазақстан-2050» Стратегиясының мақсаттарына қол жеткізу бағытынды ұсынылып отырған реформасының маңыздылығы паш ететін Үндеуі қабылданды.