Қала әкімі Рүстем Дәулет Наурыз мерекесі қарсаңында дүние есігін ашқан үшемнің ата-анасын құттықтап, сыйлық жасады.
Үшем облыстық перинаталдық орталықта 8 ақпан күні дүниеге келген. Үшеуі де ұл бала. Шерхан, Дархан және Ерхан есімді бүлдіршіндер аталған орталықтың акушер-гинекологтарының көмегімен 30 апта 6 күн мерзімінде кесір тілігі отасы арқылы дүние есігін ашқан. Туғанда салмақтары 1400, 1490 және 1495 грамм болған. Ерте туылғандықтан, сәбилерге бірден шұғыл медициналық көмек көрсетілген. Оларға жасанды тыныс беру, инкубаторларға жатқызу, дәрі-дәрмек, түтікше арқылы тамақтандыру қажет болғандықтан, интенсивті терапия бөліміне жатқызылған. Жағдайлары тұрақталған соң, нәрестелер патология бөліміне ауыстырылып, анасының жанына беріліпті. Бүгінгі күні үшемдердің жағдайлары қалыпты. Күн санап салмақ қосып келеді екен. Туғалы 37 тәулік ішінде үшемдердің бірінші сыңары Дарханның салмағы –2122, Шерханның салмағы – 2106, ал ең кішілері Ерханның салмағы 2340 грамға дейін жеткен.
Үшем – әскер қызметкер Мақсат Иманбетов пен Аиданың тұла бойы тұңғыштары. Олар алғашқы перзенттерін жеті жыл бойы күтіпті. Осы уақыт аралығында нәрестелердің анасы Аида Жебегенова өзіміздің облыс пен Алматы қаласындағы медициналық орталықтардан ем қабылдаған. Сәбилерін табиғи жолмен көтерген. Жүктілік кезінде дәрігерлердің қатаң бақылауында болыпты.
– Аллаға шүкір, перзенттерімді аман-есен босанып алдым. Нәрестелі болуы үшін жылдап қаралып, ем қабылдадық. Дәрігерлердің дұрыс нұсқауының арқасында бойыма бала бітіп, қуанышты күйге жеттім. Облыстық перинаталдық орталықтың басшылары мен дәрігерлеріне алғысым шексіз. Қазір жағдайым өте жақсы. Балаларым да салмақ қосып, өсіп келеді, – дейді жас ана Аида Жебегенова.
Жас ананы арнайы құттықтап барған шаһар басшысы Рүстем Дәулет оған гүл шоғын табыс етіп, құттықтады. Сондай-ақ әр нәрестеге балалар арбасын сыйлап, қолы ашық демеушілердің атынан материалдық көмек ретінде қаржылай сый-сияпат көрсетті. Үшемдердің жағдайымен танысқан қала әкімі олардың дендеріне саулық тілеп, еліміздің тұтқасын ұстайтын атпал азаматтары болсын деген жылы лебізін білдірді.
Облыстық перинаталдық орталық бас дәрігерінің генетология ісі жөніндегі орынбасары Талғат Толықбаевтың айтуынша, нәрестелер мен анасының денсаулығы бірқалыпты. Бүгінде орталықтан үйіне шығу үшін дайындалып жатыр екен.
Аталған орталықта өткен жылы 167 егіз және 1 үшем дүние есігін ашыпты. Ал биылғы жылдың екі айында 24 егіз және бір үшем дүниеге келген.
Шынболат Сейдуалиев
