Оқу процесі Құрлық әскерлерінің барлық құрамалары мен әскери бөлімдерінде өтуде. Дайындық үрдісін сапалы жүргізу үшін қажетті оқу-материалдық база қарастырылған. Мамандарды оқыту үшін үш мыңға жуық тәжірибелі командирлер мен нұсқаушылар тағайындалып, мың жарымнан астам оқу топтары құрылды.
– Мамандық бойынша оқу барысында Құрлық әскерлерінің бас қолбасшысы генерал-майор Талғат Қойбақовқа әскери мамандарды даярлау сапасын арттыру және жауынгерлік дайындық сынақтарын орындауда жоғары көрсеткіштерге қол жеткізу міндеті жүктелді. Жеке құрам атқаратын қызметі аясында штаттық қару-жарақ пен әскери техниканың материалдық бөлігін, тәжірибелік сабақтар барысында қолдануды игеруге, атқаратын лауазымы көлемінде функционалдық міндеттерді үйренуге тиіс, – деді бас штаб бастығы – Құрлық әскерлері бас қолбасшысының бірінші орынбасары генерал-майор Қаныш Әбубәкіров.
Мамандарды бойынша дайындық үрдісі әскери мамандықтар бойынша қатаң түрде жүргізіледі. Жауынгерлік дайындық бағдарламасына сәйкес ол үшін 100-ден астам оқу сағаты қарастырылған.
Сонымен қоса, жаттығу тренажерлары мен полигондарда өткізілетін тәжірибелік жаттығуларға ерекше көңіл бөлінуде. Оқу материалын меңгеру деңгейін анықтау мақсатында қаңтар айының басында оқу пәндері бойынша бақылау сабақтары мен сынақтар өткізілетін болады.
ҚР ҚК Құрлық әскерлерінің баспасөз қызметі
капитан Рустем Игисинов
