Ағымдағы жылғы 19 сәуірде Достық үйінде Жамбыл облысының Полиция департаменті басшылығының бастамасымен «Үкіметтік емес ұйымдар мен қоғамдық бірлестіктердің ішкі істер органдарымен адам құқықтарын қорғау бойынша өзара іс-қимылы: тәжірибе, мәселелер, шешімдер» тақырыбында конференция өтті. Кездесуді Жамбыл облысы Полиция департаментінің Жергілікті полиция қызметі басқармасы ұйымдастырды.
Конференция полицияның қоғамдық тәртіп, тұрмыстық қылмыс, нашақорлық және адамдар трафигінің алдын алу саласында жұмыс істейтін ҮЕҰ-мен жұмысын жандандыру мақсатында ұйымдастырылды. Дөңгелек үстел басында Тараз қаласының ПБ және облыстың қалалық, аудандық полиция бөлімдері бастықтарының қызмет жөніндегі орынбасарлары, қалалық ЖПҚб бастықтары, қоғамдық бірлестіктердің, үкіметтік емес ұйымдардың, сондай-ақ Қазақстан халқы Ассамблеясының құрылымдық бөліністерінің басшылары, облыстық Аналар кеңесінің, Ақсақалдар кеңесінің мүшелері және қала жұртшылығы кездесті.
Кездесуді Жамбыл облысы ІІД бастығының орынбасары полиция подполковнигі Серік Жүнісбеков ашты. Ол өз сөзінде полиция органдарының қызметінде жергілікті өзін-өзі басқару органдарының, қоғамдық ұйымдардың және жалпы халықтың қатысуымен барлық деңгейдегі мемлекеттік органдардың бірлескен күш салуымен байланысты жаңа әдістерді пайдалану қажеттілігі туындап отырғанын атап өтті. Бұл бағытта құқық бұзушылықтың алдын алудың маңызды құрамдас бөлігі әлеуметтік профилактика болып табылатыны сөз болды. Спикер кездесуге қатысушыларға тәжірибе алмасуды, барлық мәселелерді шешу жолдарын іздестіруде күш-жігер біріктіруді және жалпы қылмыстың алдын алуда ұсыныстар беру керектігіне назар аудару қажеттігін баса айтты.
Конференция барысында қатысушылармен баяндамалар оқылып, хабарламалар жасалды. Жамбыл облысы әкімдігінің әйелдер істері және отбасылық-демографиялық саясат жөніндегі комиссиясының жауапты хатшысы Бақыт Жақсылықова «Бастау» ресурстық тобының отбасын қолдау және бала құқығын қорғау, отбасылық дауларды алдын алу мәселелері бойынша жұмысы туралы айтып берді. Дағдарыс орталығының арнайы әлеуметтік қызмет көрсетуі туралы орталық директоры Жамал Қалыбекованың хабарламалары тыңдалды.
Аналар кеңесінің төрайымы Мухаббат Миражапова құқық бұзушылық пен әйелдерге қатысты қылмыстардың алдын алу мәселелері бойынша полиция органдарымен бірлескен жұмысты атап өтті. «Қоғамдык келісу» КММ басшысы Рано Убайдуллаева қоғамдық конфессиялармен жұмыс бойынша полиция органдарының өзара іс-қимылы туралы хабарлама жасады.
Басқосу барысында қатысушылар өзекті мәселелер бойынша пікірлерімен бөлісіп, құқық бұзушылықтың алдын алу және адам құқықтарын қорғау бойынша ынтымақтастықты одан әрі жандандыру жөнінде өз ұсыныстарын айтты.
Жамбыл облысы Полиция департаментінің Баспасөз қызметі
