Мемлекет және қоғам қайраткері Қаратай Тұрысовтың есімі мектепке берілді

Мемлекет және қоғам қайраткері Қаратай Тұрысовтың есімі мектепке берілді
Бүгін Тараз қаласы «Астана» мөлтек ауданында орналасқан №53 мектеп-гимназияға мемлекет және қоғам қайраткері Қаратай Тұрысовтың есімі берілді.
Аталған шараға облыс әкімі Кәрім Көкірекбаев, Қаратай Тұрысовтың жары Әскергүл Жамбайбекқызы, сондай-ақ қадірлі қонақтар, мектептің ұстаздары мен оқушылары қатысты.
Мектеп-гимназияның 1 қабатының фойесінде орналасқан Қаратай Тұрысовтың бюсті алдында оқушылар өздерінің жүрекжарды өлеңдерін оқыды.
Келген қонақтар екінші қабатта Қ.Тұрысовқа арналған бөлмені аралап, сурет көрмесін тамашалап, тілек кітабына өз лебіздерін жазып қалдырды.
Шара барысында «Өткенді ұмытпауды — болашақ ұрпаққа үлгі ету парыз», — деп атап өтті зиялы қауым өкілдері.
Айта кетерлігі, биыл мектепке ағымдағы жөндеу жұмыстары жүргізіліп, гимназия тіркесіне ие болды. 2060 оқушы оқиды, 170 ұстаз қызмет атқарады.
Сондай-ақ, ағымдағы жылдан бастап физика, химия, биология пәндері ағылшын тілінде де оқытылады.
Аталған білім ордасының материалдық-техникалық жағдайы қалыпқа келтірілген. 41 оқу кабинетінен, 2 спорт залдан, компьютерлік сыныптардан, жаңа модификациялы кабинеттерден, мәжіліс залынан және шеберханалардан тұрады.
Аз қамтылған отбасы балалары тегін ыстық тамақпен қамтылған, мектепшілік және мектептен тыс үйірмелер оқушылардың бос уақыттарының тиімді өтуіне жағдай жасайды.
Сонымен қатар, 2016-2017 жылғы оқу жылында мектеп-гимназия түлектерінің ҰБТ-ғы көрсеткіші 88 орташа баллды құрады.