Бүгін Мемлекет басшысы Қасым-Жомарт Тоқаев жуырда ғана құрылған Абай облысына жұмыс сапарымен барды, - деп хабарлайды turaninfo.kz ақпарат агенттігі БОРТ№1 телеграм арнасына сілтеме жасап.
Сапар барысында ол өңірдегі бірқатар мәдени нысандарды аралап, аймақ тұрғындарымен кездесуді жоспарлады. Ең алдымен Президент Семей жұртшылығымен емен-жарқын әңгімелесіп, өңірдің келешегі туралы ойларын ортаға салды.
— «Семей қаласының, Абай облысының Қазақстан тарихындағы орны ерекше, төл шежіремізде айрықша орны бар өлке. Бұл – қазаққа Абай, Шәкәрім, Мұхтар Әуезов сияқты біртуар перзенттерді сыйлаған ұлылар мекені. Абай туған топыраққа келген адам бұл жердің киесін сезінеді, қасиетін ұғады. Семей – ұлы даланың ұлағатты өлкесі. Бұл – Алаш арыстарының ізі қалған, зиялыларымыз елдің болашағы үшін күрескен қастерлі өңір, - деді Президент өз сөзінде.
Сонымен қатар Қасым-Жомарт Кемелұлы жаңа өңір құру туралы бастамаға не түрткі болғанын да тілге тиек етті. «Мен биыл халықтың қалауын ескере отырып, осы аймақта жеке облыс құру туралы шешім қабылдадым. Аталған қадам өңірдің әлеуметтік-экономикалық мәселелерін жедел шешіп, тұрғындардың әл-ауқатын арттыруға ықпал етеді. Инвестицияның келуіне, өнеркәсіп пен жұмыс орындарының ашылуына, шағын және орта бизнестің дамуына жағдай жасайды. Аймақты республикалық бюджеттен тікелей қаржыландыру жүйесі жүзеге асады. Бұл шешім – шын мәнінде, тарихи әділдіктің салтанат құруы. Біз жаңадан құрылған облысты ұлттың ұлы тұлғасына деген ерекше құрмет белгісі ретінде Абай деп атадық» деді Мемлекет басшысы. Бұдан әрі президент Абай өңірінің экономикалық көрсеткіштеріне жеке тоқталып, білім беру, медицина, энергетика, инфраструктуа, экология, ауыл шаруашылығы, жастар саясаты салаларындағы кейбір олқылықтарды түзеу керектігін айтып, сала басшыларына бірқатар тапсырма берді.
Жиын барысында Абай өңірінің бірқатар елеулі азаматтарына мемлекеттік наградалар тапсырылды. Атап айтқанда:
Мемлекет басшысының 2022 жылғы 29 қыркүйектегі №1027 Жарлығымен елеулі жетістіктері және Қазақстан Республикасына сіңірген айрықша еңбегі үшін:
«Парасат» орденімен «Абай атындағы театр» КМҚК артисі Бекен Имаханов;
«Парасат» орденімен еңбек ардагері Амантай Мұқатаев;
«Құрмет» орденімен «Семей цемент зауыты» ӨК» ЖШС кран машинисі Светлана Александровна Пономарева;
«Ерен еңбегі үшін» медалімен «Қайнар Агро» ШҚ суару машиналарының операторы Михаил Михайлович Лебедев;
«Шапағат» медалімен «Көкпекті жолдары» ЖШС директоры Гүлназ Құдайбергенқызы Нұрғалиева наградталды.
Президент сапары Семей қаласында тұрғызылған Мұхтар Әуезов пен Қайым Мұхамедхановқа арналған «Ұстаз бен шәкірт» ескерткішін салтанатты түрде ашу рәсіміне ұласты. Рәсімнен кейін Мемлекет басшысы халқымыздың ұлы перзенттерінің ұрпақтарымен және зиялы қауым өкілдерімен әңгімелесті. Аталған ескерткіштің биіктігі – 4 метр. Композиция қоладан құйылған. Тұғыры күрт граниттен қойылған. Авторы Нұрбол Қалиев. Ескерткіш Семей қаласының орталығына демеушілердің қаражатымен қойылған.
Президент аталмыш ескерткіштің ашылу салтанатында:
«Бұл – ұстаз бен шәкірт, аға мен іні арасындағы рухани бірліктің символы. Шын мәнінде, қос алыпты бөле-жарып қарау мүмкін емес. Олар Абай мұрасын зерттеп, дәріптеуге өлшеусіз еңбек сіңірді. Төл әдебиетімізді жаңа белеске көтерді. Мұхтар Әуезов Абайды, Абай арқылы қазақты бүкіл әлемге танытты. Ұлы ойшылдың көркем бейнесін сомдап, оның асыл мұрасын адамзаттың ортақ қазынасына қосты. Жазушының әр туындысы жұртымыздың жүрегінен өшпес орын алды. Мұхтар Әуезов – әлем әдебиетінің шыңына көтерілген қаламгер. Ал Қайым Мұхамедханов – ұлы жазушының жақын серігі әрі шәкірті. Ол бүкіл ғұмырын Абайтану, Шәкәрімтану және Алаштану ғылымына арнады. Қуғын-сүргінге ұшыраса да, тағдырдың сынағына қарсы тұрып, еліне адал қызмет етті»,- деп атап өтті.
Бұдан әрі Президент сапары М.Әуезов атындағы педагогикалық колледжде жалғасты. Президент оқу орнының тарихы мен жетістіктеріне, білім ордасынан білім алған ұлы тұлғалардың өміріне арналған көрмені аралап, оқытушылар ұжымымен және студенттермен пікірлесті.
Еркін форматта ұйымдастырылған кездесу барысында Қасым-Жомарт Тоқаев педагог мамандарға ыстық лебізін білдірді.
– Ұстаз деген – қасиетті мамандық. Бәріміз ұстазды сыйлаймыз. Себебі ұстаз – жоғары деңгейдегі тұлға. Балаларға лайықты білім беріп жатырсыздар. Білімсіз адам қауқарсыз деп айтуға болады. Қауқарсыз адам қазіргі бәсекеге толы әлемде қалай өмір сүреді? Сондықтан жас мамандарға мен ризамын. Өздеріңіз сияқты жастарды мемлекет те әрқашан қолдайды, – деді Мемлекет басшысы. Сондай-ақ Президент елімізде жастарға жағдай жасау үшін біраз реформа жүзеге асырылып жатқанын атап өтті.
Президент сапары Семей қаласындағы Невзоровтар атындағы бейнелеу өнері музейін аралаумен қорытындыланды.
Мемлекет басшысына музейдің тарихы таныстырылды. Невзоровтар музейі – Қазақстандағы көркемсурет құндылықтарын жинақтаған ірі мәдени нысандардың бірі. Музейде түрлі бағыттағы 5 мыңнан астам экспонат бар. Атап айтсақ, Қазақстан бейнелеу өнері, XVIII ғасыр аяғы және XX ғасыр басындағы орыс өнері, XVI ғасыр аяғы және XX ғасыр басындағы Батыс Еуропа кескіндемесі мен графикасы, XX ғасырдағы Ресей, Орталық Азия, Грузия, Армения, Беларусь өнері. Невзоровтар отбасы атындағы музей 1985 жылы тарихи-өлкетану музейінің ғылыми-көркем бөлімі болып құрылған. Музей мәртебесі 1988 жылы берілді.
