Аз қамтылған және көп балалы отбасылардан шыққан, жетім балалар мен ата-анасының қамқорлығынсыз қалған оқушыларға жаңа оқу жылына дайындық кезеңінде және әлеуметтік себептер бойынша балалардың мектепке бармауының алдын алу үшін жыл сайын жалпы республикалық «Мектепке жол» акциясы ұйымдастырылады.
Бүгінгі баспасөз-конференциясын өткізу мақсатымыз — бұқаралық ақпарат құралдары арқылы халыққа акцияның мақсаты туралы ақпарат беру және осы акцияға белсенді қатысуға шақыру,- деді басқарма басшысы
Биыл аталған дәстүрлі жалпы республикалық қайырымдылық акциясы 2023 жылғы 1 тамыз — 30 қыркүйек аралығында «Жақсылық жаса!» ұранымен өткізіледі.
Акцияны өткізу бойынша өңірлік іс-шаралар жоспары әзірленіп, облыстық, аудандық, қалалық ұйымдастыру комитеттері құрылды.
Акцияны өткізуге ат салысуға аудандар мен Тараз қаласының әкімдеріне, кәсіпкерлік және индустриалды-инновациялық дамыту басқармасына, «Атамекен» Ұлттық кәсіпкерлер палатасына хаттар жолданды.
Өткен жылы осы акцияның аясында демеушілер есебінен 7 656 балаға 108 млн. 308 мың теңге көлемінде қолдау көрсетіліп, қажетті құрал-жабдықтар мен киімдер үлестірілген болатын.
Айдын Орынбекқызының сөзінше
2023 жылғы шілде айының 21-23 күндері Сарысу ауданы Жаңатас қаласының Орталық базарында мектеп жәрмеңкесі өтті. Жәрмеңкеде мектеке қажетті құрал- жабдықтар және т.б тауарлар нарық бағасынан 10-15% төмен бағада сатылды.
Тараз қаласында 29 шілдеде «Grand Bazar» сауда орталығының алаңында мектеп жәрмеңкесі ұйымдастырылады. Сонымен қатар, барлық аудандарда 5-26 тамыз аралығында мектеп жәрмеңкелерін ұйымдастыру жоспарланып отыр.
Сондай-ақ, 2023 жылы «Мектепке жол» акциясы аясында жалпыға бірдей міндетті білім беру қорынан 48 671 балаға 40 567 теңгеден 1 млрд. 974 млн. 436 мың теңге қаржы қарастырылып отыр. Бүгінгі күні Тараз қаласында ата-аналардың жеке шоттарына қаржы жіберілуде. Аудандарда ағымдағы жылғы 10 тамызға дейін ата-аналардың жеке шоттарына қаржы аударылатын болады.
Білім басқармасында 1 тамыздан 30 қыркүйекке дейін ата-аналардың өтініштері бойынша «жедел желі» телефондары жұмыс істейді. Яғни, сауалдарыңыз немесе өтініштеріңіз болса 43-88-32, 43-88-25 нөмерлеріне хабарласа аласыздар.
Осындай «жедел желі» телефондары барлық білім бөлімдерінде де қызмет ететін болады.
«Мектепке жол» акциясына барлық деңгейдегі мекеме басшылары, аудан әкімдері, кәсіпкер азаматтар, мемлекеттік қызметкерлер, үкіметтік емес ұйымдар, тұрғындар атсалыса алады. Сонымен қатар, акцияға қатысуға ниет білдірген барлық азаматтар білім бөлімдеріне хабарласып, көмекке мұқтаж балалардың тізімін ала алатындығын хабарлаймыз,- деп қорытындылады Айдын Досыбаева.
