Жергілікті өзін-өзі басқаруды және қоғамдық бақылауды дамыту бойынша семинар-тренинг екінші күніде өз жалғасын тапты. Бұл күні шараны елімізге белгілі блогер-тренер Нұрлан Жаңай жүргізіп, әлеуметтік желіні дұрыс пайдалану жолдарын түсіндірді.
Сондай-ақ ол «Әлеуметтік желі психологиясы», блогерлік өнер, пост жазу әдістері, жазылмаған ережелер, нетикет, әлеуметтік желілерге шолу жасаудағы туралы өз тәжірибесімен бөлісті. Мәселен, ол «instagram» әлеуметтік желісінде салынатын фотосуреттердің сапалы болуы керектігін тілге тиек етіп, оның астына жазылатын посттың қысқа-нұсқа болуы қажеттігін жеткізді. Себебі, бұл желі фотоға негізделген. Сондай-ақ «фейсбук» желісінде салынатын жазбаның сапалы әрі «instagram» желісіне қарағанда ұзағырақ болу керектігін сөз етті. Жалпы, аталған желіде видео салудың қажеттігі жоқ екен. Әрине, мұндай қарапайым ережелерді жастар көбіне ескере бермейтіндігі белгілі. Сондықтан жастар саясатының басы-қасында жүрген мамандардың осындай ережелерді ескеруі міндетті.
Сонымен қатар, ғаламторда этикет,қалай дұрыс жазу керектігі, үтір-сызықша қалай қолдану керектігін үйретті. Қазіргі таңда, көптеген жастар әлеуметтік желіде дұрыс жаза білмейді. Мысалыға алатын болсақ «бара жатырмын» деген сөзді «баратырмын» деп сауатсыз жеткізеді.
Нұрлан Жаңай өз сөзінде
«Бұл дүние — үлкен базар, біреу сөзін, идеясын сатса, ал кейбірі ғаламтор арқылы киімін сатады»-,
деген болатын. Расында, әлеуметтік желіде жарнама, таргетинг арқылы өз кәсіптерін дөңгелетіп отырған бизнесмендер бар. Өз кезегінде семинарға қатысушы Үкіметтік емес ұйымдардың көшбасшылары, Азаматтық қоғам өкілдері, Жас мемлекеттік қызметшілер мектебінің түлектері, «Жамбыл облысы жастар ұйымдарының Қауымдастығы» заңды тұлғалар бірлестігінің мүшелері тақырыпқа қатысты сұрақтарын жолдап, тұшымды жауаптар алды. Айта кетерлігі, семинар-тренингтің екінші күні Жамбыл облысы әкімдігінің жастар саясаты басқармасының басшысы Мәди Мәтен де қатысып, жастармен пікірлесіп, ойларын тыңдады. Өз кезегінде басқарма басшысы жастардың әр бастамасына қолдау болатындығын айтып, жұмыстарына сәттілік тіледі.
