31 желтоқсан күні Жамбыл облысының әкімі Кәрім Көкірекбаев пен Тараз қаласының әкімі Нұржан Календеров үйдің кілтін салтанатты түрде табыс етті. Аймақ басшысы Кәрім Насбекұлы чемпионды құттықтап, алдағы уақытта болатын байрақты бәсекелерде жеңіс туын желбірете беруін тіледі. Сондай-ақ өңір басшылары Зульфия Габидуллинаның шаңырағында қонақ болып, дәмнен ауыз тиді.
-Адамдар армандай білу керек. Түбінде ол арман орындалады. Ол үшін аянбай еңбек ету басты шарт. Менде армандадым. Тараз-Аренаның бассейнінде жаттығу жасап жүріп, нақ осы жерде өзімнің үйім болса деп қиялдайтынмын. Бүгін сол қиялым іс жүзіне асып, дәл сол жерден үйлі болып отырмын. Ол үшін әрине облыс басшылығына алғысым зор,-деген Зульфия Габидуллина барша жерлестерін Жаңа жылмен құттықтады.
2016 жылдың 7-8 қыркүйек аралығында Бразилияның Рио-де-Жанейро қаласында өткен XV жазғы Паралимпиадалық ойындарында 100 метр қашықтыққа еркін жүзуден Әлем рекордын жаңартып, ел тариxында тұңғыш рет Паралимпиада чемпионы Зульфия Габидуллинаға облыс басшылығы мен «Бином» ЖШС демеушілік жасап, жер үй салып берді. Чемпионның жаңа үйі Айша бибі көшесі бойынан нақтырақ айтқанда, «Тараз-Арена» спорт сарайы маңайынан орын тепкен. Бас-аяғы 20 млн. теңге жұмсалған үйде мүмкіндігі шектеулі жандарға барлық жағдай жасалған, кең әрі жарық 5 бөлмесі бар. Зульфия Габидуллинаның өзі жерін таңдап, жобасын өзі жасаған үй ірі панельді арнайы Германияның теxнологиясымен бой көтерген. Сондай-ақ бөлмелеріне жылы еден төселген. Сонымен қатар чемпионға «Қазақстан Халық банкі» облыстық филиалының директоры Нұрлыбек Сейдаxмет сыйлаған 3 млн. теңгеге үйге қажетті жиҺаздар орналастырылған.
Үйге қажетті көркейтулер бойынша жұмыстарды 2017 жылдың көктем айларында «Бином» ЖШС жалғастыруды жоспарлауда екен.
ФОТО: Ақәділ Рысмахан
