Он екі айдың сұлтаны Рамазан – берекелі де кешірімі мол ай. Нәпсісін тақуалыққа тәрбиелеп, көбірек жақсылық жасауға және ізгі амалдарды атқаруға тырысқан пендесіне Алланың мейірімі төгіліп, иманын күшейтуге мүмкіндік береді.
Коронавирус пандемиясы салдарынан жамағат карантин уақтында үйлерінде отыр. Ал мешіттерде жамағатпен намаз оқуға, көпшілік жиналған жерлерде ас беріп, жиын өткізуге ғұламалар кеңесінің шешімімен тыйым салынды. ҚМДБ-ның Төрағасы, Бас мүфти Наурызбай қажы Тағанұлының: «Жұқпалы індеттің таралуының алдын алу мақсатында мешіттерде, дәмханаларда, қоғамдық орындарда т.б. мекемелерде жиналып ауызашар беруді уақытша тоқтатуға шақырамыз»-деген, үндеуіне бойұсынып, әркім өз отбасының қасында бала-шағасының тәрбиесіне, иманы мен амалына, мінез-құлқына көңіл бөлуде. Карантин, жанұясымен бірге сыртқа шыға алмай отырған мұқтаж отбасылары мен ауыз бекіткендер үшін және ауыз ашар берушілерге жазылатын сауаптан үміт еткен азаматтардың қайырымдылық іс-шарасына кедергі емес.
Рамазан айында ауызашар берудің сауабын білмейтін адам кемде-кем шығар. Алайда бүгінгі оқиғаларға байланысты бұл сауапты амалды қалай жасаса болады? Мешіттерде беріліп жатқан ауыз ашарлар биыл өзгеше форматта өтіп жатыр. Орталық «Һибатулла Тарази» мешіті мен қала, аудан орталық мешіттері асханалар мен кафелерге ас мәзіріне тапсырыс беріп, жылдағы ауыз ашарға келіп жүрген жамағаттардың үйлеріне апарып беруде. Рамазан айында мешіттерде жамағатпен оқылатын 20 ракағаттық Тарауих намаздарын әркім өз отбасымен үйлерінде оқуда.
Рамазанның сауабы мен берекесінен үміті бар азаматтар көп балалы аналар мен әлеуметтік тұрмысы нашар жандарға азық-түлік пен басқа да қайырымдылықтарын дайындап, орталық «Һибатулла Тарази» мешітіне өтініштерін беріп жатқан мұқтаж отбасыларының тізімін алып, үйді -үйге таратып беруде.
Алла Тағала баршамыздың ізгі амалдарымызды қабыл етсін.
Орталық «Һибатулла Тарази» мешітінің наиб имамы Ғалымбек Төлегенұлы
