Күйеуі Айжан Мұсаеваны төрт баласымен көшеде қалдырған соң, ол аналар үйіне қайырылған. Сорақысы төрт бүлдіршіннің екеуі – мүгедек. Бір баласы аутизмге, екіншісі – сал ауруына шалдыққан.
Балаға төленетін жірдемақыға күн көре алмайсың. Төрт балама 100 мың теңгедей аламын. Бар ақшамыз пәтер жалдауға жұмсалатын, себебі ешқашан өз үйіміз болған емес. Үдің кезегіне де тұра алмадық. Ол үшін тіркеуде болу керек, — дейді Айжан Мұсаева.
Аналар үйіне түскенше, Айжан ешқашан қол қусырып отырған емес. Қара жұмыс болса да, шыға беретін. Бастысы балаларының қарындары тоқ, киімдері таза және бүтін болса деген ниет. Аналар үйінің қызметкерлері Айжанның еңбекқорлығын, балаларына деген махаббаты мен қамқорлығын байқап, «Асар Уме» қорының Тараздағы өкілдігі «Кәусар – Тараз» қорынан осы отбасыға көмек қолын созуға ұсыныс білдірді. Олар да бар жағдаймен танысып, қажетті құжаттарды рәсімдеуге көмектесті. Ары қарай «Асар Уме» қоры келісім беріп, барлығы ертегідегідей аяқталды.
«Асар Уме» қорының Тараздағы өкілдігі «Кәусар – Тараз» қоры басшысы Сухраб ШАЮСУПОВТЫҢ айтуынша, бір жылда қор жамбылдық 25 жанұяға баспана сыйлаған.
Алдымен адамдар инстаграмдағы парақша арқылы хабарласады. Келіссөздер өткен соң, қажетті құжаттар рәсімделіп, жұмыс тобы отбасының жағдайымен танысуға барады. Танысып ғана қоймай, фото және видео материал жинап, қалған құжаттарды дайындайды. Қазіргі уақытта біздің облыс бойынша баспана алуға кезекте 15 отбасы тұр. Сонымен қатар «Аса Уме» қоры білім алуға да мүмкіндік береді, — түсіндірді Сухраб Шаюсупов.
Барлығынан да Айжанның балаларының қуанышын айтсаңызшы! Кең үйде енді әрқайссысының өз бөлмесі бар. Ауласы мен бақшасы да үлкен.
— Бүгін менің өмірімдегі ең бақытты күн! Осындай қуанышты сыйлаған барша жандарға алғысым шексіз! Енді мен де балаларым үшін жаным тынышталып, басқа отбасыларға көмектесуге дайынмын. Себебі олардың қалай қиналып жатқандарын, басымнан өткен соң, түсінемін, — дейді Айжан.
Айжан АУЕЛБЕКОВА
Мақала Жамбыл облысы әкімдігі ішкі саясат басқармасының ақпараттық саясаты тапсырысы негізінде жарияланды
